მელიტოპოლის მერის, ივან ფედოროვის განცხადებით, რეფერენდუმის ჩატარებას მხოლოდ მოსახლეობის 10% უჭერს მხარს.

რატომ არის მნიშვნელოვანი: მელიტოპოლი უკრაინის ტერიტორიაა, რომელიც რუსებს აქვთ ოკუპირებული.

  • ოკუპანტები რეფერენდუმის ჩატარებისთვის ჯერ კიდევ ივნისში ემზადებოდნენ.
  • ფედოროვი აცხადებს, რომ რუსეთი რეფერენდუმის თარიღს ვერ გამოაცხადებს, რადგან მოსახლეობის დიდი რაოდენობა მასში მონაწილეობას არ თანხმდება.

დეტალები: მერის ინფორმაციით, რუსებმა სახლებში ჩამოვლა და მოსახლეობის გამოკითხვა დაიწყეს, რათა შეამოწმონ რა ნაწილი უჭერს მხარს რეფერენდუმის ჩატარებას.

  • ფედოროვის თქმით, უახლოეს ორ კვირაში ფსევდორეფერენდუმის გამართვის შესაძლებლობა ჯერჯერობით არ არსებობს.
  • "არ არსებობს მკაფიო თარიღი ზაპოროჟიეს რეგიონის ოკუპირებულ ნაწილში ფსევდორეფერენდუმის ჩატარებისთვის და არც დეტალური გეგმები, რომლებსაც კონკრეტული თარიღი ექნება".
  • მან აღნიშნა, რომ ყველა, ვინც დათანხმდა ოკუპანტებთან თანამშრომლობას და მზად არის მიიღოს ხელფასი მათგან, კარგად არის ცნობილი უკრაინის ძალოვანი სტრუქტურებისთვის.

გარდა ამისა, ღამით მელიტოპოლში უკრაინელმა პარტიზანებმა ააფეთქეს რუსი დამპყრობლების შტაბი, სადაც ისინი სწორედ რეფერენდუმისთვის ემზადებოდნენ.

  • "ყველაფერი, რაც რამით უკავშირდება ფსევდორეფერენდუმის მომზადებას, ადგილზე განადგურდება", — განაცხადა მერმა.
  • მისივე თქმით, სწორედ ამ შტაბში ოკუპანტებმა უკრაინელებზე რუსული პასპორტები გასცეს.