ღონისძიების ორგანიზატორები როგორც საქართველოს, ასევე, უკრაინის მოქალაქეები არიან.

რატომ არის მნიშვნელოვანი: დღეს, 24 აგვისტოს უკრაინის დამოუკიდებლობის დღეა. სწორედ ამასთან დაკავშირებით აპირებენ მოქალაქეები ღონისძიების ჩატარებას.

  • თუმცა, ბათუმის მერიამ ორგანიზებაში დახმარების სანაცვლოდ, მათ მოთხოვნები წამოუყენა.

რას ამბობენ ორგანიზატორები: კონცერტი ორი კვირის წინ დაგეგმეს, მერიისგან თანხმობა და ტექნიკური მხარდაჭერის პირობა, შემდეგ კი ულტიმატუმი მიიღეს — ომი, ოკუპაცია და რუსეთი არ ეხსენებინათ.

  • ასევე, არ გაეშვათ ქართველი და უკრაინელი მებრძოლების ვიდეომიმართვა.
  • "მიზეზი იყო ის, რომ არ უნდა გაგვეღიზიანებინა რუსი სტუმრები, რომლებიც ბათუმში არიან, რომ რამე პროვოკაცია არ ყოფილიყო", — ამბობენ აქტივისტები.
  • მათივე თქმით, ზეწოლისა და ულტიმატუმების შემდეგ, ერთი დღით ადრე მერიამ კონცერტის გამართვაზე პირდაპირი უარი თქვა.

ვრცლად: ბათუმელებთან ერთ-ერთი ორგანიზატორი, ნიკა ქაშიბაძე ამბობს, რომ ღონისძიების მზადებისას პირველად ბათუმის კულტურის ცენტრს დაუკავშირდნენ, სადაც უთხრეს, რომ ომის თემატიკაზე არ ესაუბრათ.

  • აღნიშნავს, რომ ეს პირობა მიუღებელი იყო, ამიტომ შეეცადნენ ისეთი ადამიანი მოეძებნათ, ვისთანაც საუბარს შეძლებდნენ და სოფო ხალვაში ურჩიეს რადგან ის "პროევროპული, საღად მოაზროვნე ადამიანი იყო".
  • ამბობს, რომ რამდენიმე საათში მისგან პასუხი მიიღო, რომ ღონისძიების ჩატარების უფლება აქვთ, თუმცა ერთადერთი თხოვნაა, "ცოტა დოზირებულად" ისაუბრონ ომზე და "დეტალებში არ შევიდნენ".
  • ქაშიბაძის თქმით, დასთანხმდნენ, გუშინ, 23 აგვისტოს კი ხალვაშმა წამოაყენა პირობა, რომ ამოეღოთ ვიდეოები, სადაც ქართველი და უკრაინელი მებრძოლების მილოცვა იყო.
  • "ამაზე ვერ დავთანხმდებოდით. იძულებული გავხდით, ეს ამბავი გაგვესაჯაროებინა და გაეგო საზოგადოებას ბათუმის მერიის პოზიცია".
  • მისი თქმით, ხალვაშთან ისიც განმარტა, რომ ღონისძიება პოლიტიკური შინაარსის არ არის.

უარის შემდეგ ორგანიზატორებმა სცენის აშენება საკუთარი სახსრებით გადაწყვიტეს. ცოტა ხნის წინ კი მათთან ბათუმის მუნიციპალური ინსპექციის წარმომადგენლები მივიდნენ და სცენის დემონტაჟი მოსთხოვეს.

  • უწყების მტკიცებით, ღონისძიების შინაარსის მიუხედავად, "სცენის დადგმას ქალაქის ტერიტორიაზე ნებართვა სჭირდება".
  • სამსახურმა ორგანიზატორებს სცენის აღება მოსთხოვა, წინააღმდეგ შემთხვევაში კი დემონტაჟით იმუქრება.

რას ამბობს მერი: არჩილ ჩიქოვანმა ქართული ოცნების ოფისში გამართულ ბრიფინგზე ნაციონალურ მოძრაობა და მისი "რადიკალური ტელევიზიები" პროვოკაციების მოწყობაში დაადანაშაულა.

  • ამტკიცებდა, "თითქოსდა უკრაინის დამოუკიდებლობის დღის საფარქვეშ" მათ ისტერია მოაწყვეს.
  • მისივე მტკიცებით, ღონისძიებაზე ანტისახელმწიფოებრივი განცხადებები იყო დაგეგმილი და ამის შესახებ მერიაში "ჰქონდათ ინფორმაცია".
  • კითხვაზე, ჰქონდა თუ არა მერის მოადგილეს, სოფო ხალვაშს ღონისძიების შინაარსში ჩარევის უფლება, ჩიქოვანი ამბობს, რომ კულტურული ღონისძიებების ნაწილში ის უფლებამოსილია "კონკრეტული საორგანიზაციო საკითხები შეითანხმოს".

წინააღმდეგობის მიუხედავად, კონცერტის გამართვას ორგანიზატორები მაინც გეგმავენ და მოქალაქეებს მოუწოდებენ, ღონისძიებას შეუერთდნენ.

  • ღონისძიებაში მონაწილეობის სურვილი სხვადასხვა პარტიის წარმომადგენლებმაც გამოთქვეს.