ანტიდასავლური ოთხეული წერს, რომ უპასუხოდ ვერ დატოვებენ აშშ-ის საელჩოს მიერ ISFED-თან დაკავშირებულ განცხადებას.

რატომ არის მნიშვნელოვანი: პარტიიდან წასვლის შემდეგ მიხეილ ყაველაშვილი, დიმიტრი ხუნდაძე და სოზარ სუბარი ანტიდასავლურ ნარატივებს აჟღერებენ. მათ მოგვიანებით შეუერთდა გურამ მაჭარაშვილიც.

• ისინი უკვე არაერთხელ დაესხნენ თავს ამერიკის შეერთებული შტატების ელჩს.
• რაც შეეხება ISFED-ს, ქართულმა ოცნებამ ორგანიზაცია საარჩევნო რეფორმის სამუშაო ჯგუფში არ მიიწვია და თქვეს, რომ პროცესში მხოლოდ იმ ორგანიზაციებს შეუძლიათ მონაწილეობის მიღება, რომლებიც "ნეიტრალიტეტს" ინარჩუნებენ.
• გადაწყვეტილება კრიტიკულად შეაფასეს არასამთავრობო ორგანიზაციებმა, ევროკავშირის წარმომადგენლობამ და ასევე, საელჩომ.
• საელჩოს განცხადებით, ISFED ერთ-ერთი ყველაზე სანდო საარჩევნო სადამკვირვებლო ორგანიზაციაა და მისი არდაშვება პროცესის გულწრფელობაზე ეჭვებს ბადებს.

დეტალები: წასულების სიტყვებით, ISFED გასულ ორი წლის განმავლობაში ორჯერ მოექცა რევოლუციური პროცესების ავანდგარდში. ერთ-ერთ მაგალითად მათ პარალელური დათვლის შედეგები მოჰყავთ.

• ოთხეულის მტკიცებით, ორგანიზაცია "იძულებული გახდა" ცდომილებები ეღიარებინა, როცა, მმართველმა პარტიამ მათ "უტყუარი მტკიცებულებები" წარუდგინა.
• მათი თქმით, "PVT-ის გაყალბება" გახდა არჩევნების გაყალბებულად გამოცხადებისა და პარლამენტის საბოტაჟის საბაბი.
• 2020-ის დეკემბერში ორგანიზაციამ განაცხადა, რომ გამოავლინა ხარვეზები საარჩევნო სუბიექტების მიერ მიღებული ხმების გამოსათვლელ ფორმულაში. რის შემდეგაც ხელმძღვანელმა თანამდებობა დატოვა

ანტიდასავლური ოთხეულის აზრით, როდესაც ISFED-ს აშშ-ის საელჩო ერთ-ერთ ყველაზე სანდო სადმკვირვებლო ორგანიზაციას უწოდებს, "ცხადია, რაშიც არის საქმე".

• "ბუნებრივია, ეჭვიც არ გვეპარება, რომ საელჩო ISFED-ს სრულად ენდობა. ბოლოს და ბოლოს, მან ამ ორგანიზაციას PVT-ის გაყალბებაც კი ანდო".
• წერენ, რომ "ოცნებამ" ორგანიზაციას პარალელური დათვლის შედეგების "გაყალბება აპატია", რადგან, როგორც ისინი ამბობენ, წინააღმდეგ შემთხვევაში, არა ISFED-თან, არამედ, საელჩოსთან შევიდოდნენ კონფლიქტში.
• ამის შემდეგ, წასულები ამბობენ, რომ საელჩოს "მადლიერება უნდა გამოეხატა", ამის ნაცვლად, კი ორგანიზაციას ერთ-ერთი ყველაზე სანდო უწოდა.

ისევ როვოლუციური სცენარი: წასულები ISFED-ს სხვა არასამთავრობო ორგანიზაციებთან ერთად რევოლუციურ სცენარში ადანაშაულებენ, ხოლო საელჩოს ამ სცენარის განხორციელების კოორდინირებაში.

• "საელჩო ქართულ ოცნებას პირდაპირ ეუბნება, რომ რევოლუცია უნდა მოხდეს, ნაციონალური მოძრაობა მეორე ფრონტის გასახსნელად ხელისუფლებაში უნდა დაბრუნდეს და ქართული ოცნება და საზოგადოება ამას მშვიდად უნდა შეეგუონ".
• მათი აზრით, თუ ხელისუფლება "დათმობს" და სამუშაო პროცესში ISFED-ს ჩართავს, ეს ენმ-სა და საელჩოს წინაშე კაპიტულაცია იქნება.

გარდა ამისა, ოთხეული ამბობს იმასაც, რომ 2 თვის წინ გამართული აქციებისას ორგანიზაციის ხელმძღვანელი პარლამენტის წინ იდგა, ტექნიკური მთავრობის ფორმირებას ითხოვდა და "ქვეყანას წალეკვით ემუქრებოდა".

• წასულები აქაც საელჩოს "დანაშაულს" ხედავენ და წერენ, რომ იმ დღეს სცენაზე არა ISFED, არამედ საელჩო იდგა.
• "ამ მოთხოვნის ავტორი, რეალურად, საელჩოა, რომელიც მის დაყენებას, ცხადია, მომავალში გეგმავს".
• ისევ აპელირებენ საქართველოში "მეორე ფრონტის გახსნის" საკითხით და კვლავ აჟღერებენ ნარატივს, რომ საელჩოს მიზანი ქართული ოცნების ხელისუფლების ნაციონალური მოძრაობით ჩანაცვლებაა.