შვიდწლიანი პატიმრობის შემდეგ, ტრანსგენდერი ქალი ჩელსი მენინგი ციხიდან გამოვიდა. ინფორმაციას CNN ავრცელებს. აშშ-ს ჯარში ანალიტიკოსად მომუშავე მენინგმა 2010 წელს 700 ათასზე მეტი საიდუმლო დოკუმენტი ვიკილიქსის საშუალებით გაასაჯაროვა.

ჩელსი მენინგი დაკავებამდე ბრედლი მენინგი იყო. ციხის დატოვების შემდეგ, მან თავისუფალ გარემოში ცხოვრება პირველად დაიწყო როგორც ქალმა.

მენინგმა ციხეში ყოფნის დროს განაცხადა, რომ ტრანსგენდერი ქალი იყო. მისი ადვოკატის თქმით, მენინგმა კაცებთან ერთად ციხეში პატიმრობისას დიდი ტრავმა მიიღო, რომლისგანაც ეტაპობრივად გათავისუფლდება.

ბარაკ ობამამ პრეზიდენტობის დასრულებამდე სულ ცოტა ხნით ადრე გადაწყვიტა მენინგის შეწყალება. მას ქვეყნის ისტორიაში უსაფრთხოების სფეროს ყველაზე სკანდალური საქმის გამო 35 წლით პატიმრობა ჰქონდა მისჯილი.

2013 წელს გამართულ სასამართლო პროცესზე მენინგმა ჩადენილი დანაშაულის გამო ბოდიში მოიხადა:

"ბოდიშს ვიხდი იმისათვის, რომ ადამიანებს ტკივილი მივაყენე, ბოდიშს ვიხდი, რომ შეერთებულ შტატებს ზიანი მივაყენე".

ციხიდან გამოსვლის შემდეგ, მენინგმა განცხადებაც გაავრცელა:

"ოთხი მშფოთვარე თვის შემდეგ, ეს დღე საბოლოოდ დადგა. ძალიან ბევრ რამეს ველი ჩემს ცხოვრებაში და რაც მომავალში მელის, ბევრად უფრო მნიშვნელოვანია, ვიდრე ჩემი წარსული. ძალიან ბევრი სიახლე დამხვდა, რომლებიც ერთდროულად ამაღელვებელია, მხიარული, საოცარი და უცხო".

მენინგმა გათავისუფლების დღესვე ინსტაგრამის პროფილი შექმნა, სადაც თავისი სურათები გამოაქვეყნა, რომლებზეც თავისუფლების პირველი ნაბიჯები ასახა.

First steps of freedom!! 😄 . . #chelseaisfree

A post shared by Chelsea E. Manning (@xychelsea87) on