ცნობილმა დანიელმა მსახიობმა, მადს მიკელსენმა, რომელმაც ჯადოსნური ცხოველების სერიის მესამე ფილმში გელერტ გრინდელვალდის როლი შეასრულა, ჯონი დეპი შეაქო და განაცხადა, რომ ეს უკანასკნელი შეიძლება ფრენჩაიზში დაბრუნდეს.

მიკელსენმა გრინდელვალდის როლზე ჯონი დეპი მას შემდეგ შეცვალა, რაც წაგებული სასამართლო დავის შემდეგ Warner Bros.-მა მსახიობს როლის დატოვება მოსთხოვა. დეპმა პერსონაჟი სერიის წინა ფილმებში განასახიერა, თუმცა, კინოკრიტიკოსების აზრით, როლი მიკელსენმა უკეთ შეასრულა.

ჯონი დეპმა, რომელსაც ყოფილი ცოლი, მსახიობი ამბერ ჰერდი, ოჯახში ძალადობაში ადანაშაულებდა, ამ უკანასკნელის წინააღმდეგ წამოწყებული სასამართლო დავა რამდენიმე კვირის წინ მოიგო. ალბათ სწორედ ამ ფაქტს უკავშირდება ჯადოსნური ცხოველების ფრენჩაიზში დეპის დაბრუნების პერსპექტივა.

სარაევოს კინოფესტივალზე მადს მიკელსენმა აღნიშნა, რომ დეპისთვის განკუთვნილი როლის მიღება მისთვის "მეტად საფრთხილო" იყო.

"თუმცა, ახლა ყველაფერი შეიცვალა", — აცხადებს მიკელსენი, — "საქმე მოიგო, ასე რომ, ვნახოთ, თუ დაბრუნდება. შეიძლება დაბრუნდეს.

"მე ჯონის დიდი ფანი ვარ. ვფიქრობ, ის შესანიშნავი მსახიობია და საქმეს თავი არაჩვეულებრივად გაართვა".

მიკელსენი დასძენს, რომ იგი ზედმიწევნით ვერ მიბაძავდა დეპის განსახიერებულ პერსონაჟს, რადგან ეს "შემოქმედებითი თვითმკვლელობა" იქნებოდა.

"ამდენად, სხვა რაღაც მოვიფიქრეთ. რაღაც, რაც ჩემი წილიც იყო და რამაც ჩვენ ორი დაგვაკავშირა. ეს კი ნამდვილად საფრთხილო იყო", — ამატებს მიკელსენი.

დანიელი მსახიობი ასევე შეეხო დეპის განაწყენებული გულშემატკივრების თემას და აღნიშნა, რომ ისინი ძალიან გულკეთილები, მაგრამ ჯიუტები არიან.

"მათთან დიდად არ ვურთიერთობდი, მაგრამ მესმის, რატომ დასწყდათ გული", — ამბობს მიკელსენი.

ფოტო: Warner Bros.

ჯონი დეპმა ყოფილ ცოლს, ამბერ ჰერდს, რამდენიმე წლის წინ ცილისწამებისთვის უჩივლა. 6-კვირიანი პროცესის შემდეგ, სასამართლომ ჯონი დეპისთვის ზარალის ასანაზღაურებლად ჰერდს $15 მილიონის გადახდა დააკისრა, ხოლო ჯონი დეპს ყოფილი ცოლისთვის ზარალის $2 მილიონით ანაზღაურება დაევალა.

სასამართლოს მოგების გამო, წლების შემდეგ დეპმა ახალი როლი პირველად მიიღო. იგი მაივენ ლე ბესკოს ფილმში Jeanne du Barry საფრანგეთის მეფე ლუი XV-ს განასახიერებს.

დეპი ასევე აპირებს, სრულმეტრაჟიანი ფილმი თავადვე გადაიღოს. იგი მხატვარ ამედეო მოდილიანის ცხოვრების შესახებ შექმნილი კინოსურათის რეჟისორი იქნება, ამავე ფილმის პროდიუსერის როლს კი ალ პაჩინოც მოირგებს.