ნეკა დოროყაშვილმა თბილისის საქალაქო სასამართლოში ჩვენება მისცა.

რატომ არის მნიშვნელოვანი: ქართველ ჩოგბურთელს, ნიკოლოზ ბასილაშვილს არასრულწლოვანი შვილის თანდასწრებით ყოფილ ცოლზე ძალადობაში ედება ბრალი.

• რამდენიმე თვის წინ ამ საქმის ფაილები გავრცელდა, სადაც ისმოდა, რომ ჩოგბურთელი ყოფილ ცოლს შეურაცხყმოფელად მოიხსენიებს და მის დამცირებას ცდილობს.
• დღევანდელ სხდომაზე დოროყაშვილმა ყოფილი ქმრის მხრიდან ძალადობისა და შეურაცხყოფის შესახებ ისაუბრა და ვიდეომტკიცებულება წარადგინა.

ფსიქოლოგიური ძალადობა და შეურაცხყოფა: დოროყაშვილი იხსენებს, რომ ყოფილი ქმარი მას სხვადასხვა ცხოველის სახელს ეძახდა, მათ შორის მაშინ, როდესაც ორსულად იყო.

• "მაგალითად, მეძახდა ვირთხას, გველს, რწყილს".
• მისი თქმით, ბასილაშვილი გამუდმებით აკონტროლებდა — ურჩევდა მეგობრებს, სოციალურ ქსელში დასადებ ფოტოებს და ა.შ.
• როგორც ის ამბობს, ყოფილი ქმარი მიიჩნევდა, რომ მას არ უნდა ემუშავა და სწავლა არ გაეგრძელებინა.
• "ერთ დღეს გამომიცხადა, რომ მე ვარ მეფე და შესაბამისად, მე უნდა მოვქცეულიყავი როგორც მისი ქვეშევრდომი".

ფიზიკური ძალადობა: დოროყაშვილმა ფიზიკური ძალადობის არაერთ შემთხვევაზე ისაუბრა, პროკურატურამ კი ვიდეო წარადგინა.

• "ყოფილა შემთხვევა, როდესაც კონფლიქტის მერე საწოლზე წამოვწოლილვარ, გამოუღია მაცივრიდან ცივი წყალი და ჩემთვის ჩაუსხამს ყურში. იყო თმით თრევა, საჭმლის შეყრა სახეში".
• დოროყაშვილის თქმით, ერთ-ერთი შემთხვევისას ბასილაშვილმა სასტუმროს ოთახში თმით ითრია, მუცელში წიხლები ურტყა და თავში დაარტყა.
• მისივე თქმით, ძალადობის შემდეგ ბასილაშვილმა ნივთების ჩალაგება დაიწყო ჩოგნების ჩანთაში და როდესაც დაასრულა, ეს ჩანთა მას ესროლა.
• ვიდეოში მართლაც ჩანს როგორ როგორ ალაგებს ბასილაშვილი ჩანთას და შემდეგ დოროყაშვილის მიმართულებით ისვრის.

გარდა ამისა, დოროყაშვილი ნიკოლოზ ბასილაშვილის დედის მხრიდან ბავშვზე ფსიქოლოგიური და ფიზიკური ძალადობის შემთხვევებზეც საუბრობს.

• მისი თქმით, ბებიამ ბავშვს უთხრა, რომ "დედის ჭუჭყიან მუცელში იჯდა".
• დოროყაშვილი ამბობს, რომ ბავშვმა მოუყვა, როგორ დაარტყა ბასილაშვილის დედამ თავში.
• "ფსიქოლოგიური ექსპერტიზა ჩაუტარდა ლუკას და მას შემდეგ გამოეწერა ნიკოლოზის დედას შემაკავებელი ორდერი", — ამბობს ის.

ნიკოლოზ ბასილაშვილი პროცესს დისტანციურად ჩაერთო.

• მანდ ძალადობის ბრალდებები უარყო, ვიდეომტკიცებულებას კი სისულელე უწოდა და თქვა, რომ მისი მხრიდან არც ძალადობა და არც გინება არ ჩანს.

არქივიდან: ნიკოლოზ ბასილაშვილს თბილისის საქალაქო სასამართლომ 100 ათასი ლარის ოდენობის გირაო შეუფარდა. ამასთან, შემაკავებელი ორდერი იყო გამოცემული როგორც ჩოგბურთელის, ისე მისი მშობლების მიმართ.

• 22 იანვარს TV პირველმა გაავრცელა აუდიოჩანაწერები, რომელიც მათი თქმით, ნიკოლოზ ბასილაშვილსა და ნეკა დოროყაშვილს ეკუთვნის.
• ჩანაწერებში ჩოგბურთელი დოროყაშვილს სოციალურ ქსელში პოსტის რეკლამირებისთვის ეკამათება და ეუბნება, რომ "ღირსება" არ გააჩნია, რაზეც დოროყაშვილი პასუხობს, რომ ამ ფულს დაუბრუნებს.
• ჩანაწერებში ისმის კამათი შვილთან დაკავშირებით — ბასილაშვილი დოროყაშვილს ეუბნება: "შენ თვითონ გაზრდი და მოუარე".
• ის ფაილების ნამდვილობას არ უარყოფს, თუმცა ამტკიცებს, რომ დიალოგი, სადაც მისი და ყოფილი ცოლის საუბარი ისმის,"სრული სახით ნაჩვენები" არ ყოფილა და "ნამდვილ შინაარსს არ ასახავდა".