საქართველოს სახალხო დამცველი, უჩა ნანუაშვილის განცხადებით, ლგბტ პატიმრები
დისკრიმინაციის მსხვერპლი ხდებიან ციხეში პენიტენციალური თანამშრომლების მხრიდან. ომბუდსმენი მოუწოდებს ხელისუფლებას, იმუშავოს ციხის თანამშრომელთა ცნობიერების ამაღლებაზე და შეიმუშავოს პროგრამა ლგბტ პატიმრების დასაცავად.

საქართველოს სახალხო დამცველმა ლგბტ (ლესბი, გეი, ბისექსუალი, ტრანსგენდერი) პატიმრების უფლებებზე დღეს, 2 ივნისს, სასტუმროში რადისონ ბლუ ივერიაში ისაუბრა სადაც ჰაინრიჰ ბიოლის ფონდის სამხრეთ კავკასიის რეგიონული ბიურო ატარებს რეგიონულ კონფერენციას "სოლიდარობა თანასწორობისთვის: ლგბტ ადამიანთა უფლებები და მდგომარეობა სომხეთსა და საქართველოში. პროექტი ევროკავშირის ფინანსური მხარდაჭერით 2015 წელს დაწყებული სამწლიანი პროექტის ლგბტ სოლიდარობის ქსელი სომხეთსა და საქართველოში ფარგლებში ხორციელდება.

სახალხო დამცველის თქმით, საქართველოში დღეს მოქმედი კანონი არ ავალდებულებს კერძო დაწესებულებებს, ომბუდსმენის ოფისს მიაწოდონ ინფორმაცია ლგბტ პირთა დისკრიმინაციის შესახებ და ეს არის მნიშვნელოვანი ხარვეზი. ომბუდსმენის შეფასებით, ასევე მნიშვნელოვანი პრობლემები ექმნებათ ტრანსექსუალებს პასპორტში სქესის მითითებასთან დაკავშირებით, რაც მათ სამსახურის შოვნაში ხელს უშლის.