10 საქმე, რომლითაც ზაფხულში ზღვაზე დასვენების ნაცვლად შეგიძლია დაკავდე

არ ვიცი, ზაფხულს როგორ ატარებ. შეიძლება ახლა ზღვის პლაჟზე ნებივრობ და არანაირი სადარდებელი არ გაწუხებს. თუმცა, ნებივრობისთვის დასაკარგი წუთები შეიძლება შესაძლებლობად აქციო და პროდუქტიულად გამოიყენო. დასვენებას რომ არ მოცდე, უცბად ჩამოგიწერ სიას — რა შეგიძლია გააკეთო ამის ნაცვლად.

1. ჩაფიქრება კითხვაზე, ჯერ კვერცხი გაჩნდა თუ ქათამი

ამ უმნიშვნელოვანესი საკითხის გადასაწყვეტად ერთი ზაფხული, რა თქმა უნდა, არ გვეყოფა, მაგრამ კიდევ ხომ მოვა შვებულების დრო?! პროგრესი კი წარმატებასთან გვაახლოებს!

2. ვარჯიში ენის იდაყვამდე მისაწვდენად

ამ უნარით მთლად ამაზონში ვერ მოხვდები, მაგრამ მსოფლიოს რამდენიღაც პროცენტში მაინც შეხვალ.

3. ცხვირით ბეჭდვის სწავლა

მომავალ ზაფხულს გართულებაც შეიძლება — მაგალითად, ცხვირით ყავის მოდუღება რომ ისწავლო.

4. ტროტუარზე ისე სიარული, რომ ლავა არ ამოიფრქვეს

მოვა დრო და ეს უნარი დაფასდება!

5. სიტყვების უკუღმა წაკითხვის სწავლა

მერე ნიჭიერშიც შეგიძლია სცადო ბედი.

6. სულაც ახალი ენის შექმნა

ან ქაჯური ენის გახსენება, თუფუ გაფახსოფოვს.

7. ფორტეპიანოზე დაკვრის სწავლა

აუცილებელი სულაც არაა, ნოტები იცოდე. მთავარია, ახლო-მახლო ინსტრუმენტი იშოვო და ნამდვილი ხელოვანის იერი მიიღო.

8. კიტრის დაჭრის სწავლა

გგონია, ადვილია???

9. ისეთი სიტყვების დაგუგლვა, როგორიცაა ბლოკჩეინი ან ქოუდინგი

ამ ზაფხულს თუ ვერ ისწავლი, გეცოდინება მაინც, რა არის.

10. თავის მოჩვენება, თითქოს მუშაობ

შემოდგომაც დადგება და ეს უნარი გამოგადგება.

რა თქმა უნდა, ყველა მნიშვნელოვანი საქმის შესრულება ერთ ზაფხულს არაა აუცილებელი. მთავარია, შემართება გქონდეს — მათ შორის, დასასვენებლად.

დასასრულს სწორედ მაგას შეგახსენებ, რომ დასვენება ძალიან მნიშვნელოვანია, როგორც ჩვენი ფიზიკური, ასევე მენტალური ჯანმრთელობისთვის. რამდენადაც უნდა გიყვარდეს მუშაობა და საკუთარ თავს "ვორკაჰოლიკადაც" თვლიდე, დასვენებისა და ძალების აღდგენის გარეშე, საეჭვოა, მისი ეფექტურად შესრულება განაგრძო.

ბოლო ამბები:

გირჩევთ