კარდაშიან-ჯენერების ოჯახი რომ მსოფლიოს ყურადღების მიპყრობას ნებისმიერი წვრილმანით ახერხებს, ეს საიდუმლო ნამდვილად აღარავისთვისაა. ოჯახის ახალი რეალითი შოუ, სახელად The Kardashians მთავარი დასტურია. ამის მიუხედავად, მაინც არავინ ელოდა, რომ ეპიზოდში მოყოლილ ყველა ისტორიას ერთი მომენტი გადაფარავდა — როგორ (ვერ) ჭრის კენდალ ჯენერი კიტრს.

ინტერნეტში ვირუსულად გავრცელდა ვიდეო, რომელშიც კენდალ ჯენერი კიტრის დაჭრას ცდილობს. თავიდან კრის ჯენერი შვილს სთავაზობს, რომ კიტრს მზარეული დაუჭრის, თუმცა კენდალი უარობს და ბოსტნეულს თავად ერკინება. ეს ბრძოლა მარტივი როდია: კენდალი ვერ წყვეტს, როგორ და რომელი მხრიდან დაჭრას კიტრი და საკუთარ თავთან ერთად მაყურებელსაც ტანჯავს.

"ცოტა მეშინია", — გვიმხელს კენდალი, შემდეგ კი ოპერატორს ეუბნება: "კარგად ვერ ვჭრი, ამიტომ ახლოდან არ გადამიღო. პროფესიონალი არ ვარ".

კენდალის ვიდეოს ტვიტერის მომხმარებლები კრიტიკით შეხვდნენ. მათი თქმით, გადაცემის პროდიუსერებსა და ოჯახს უნდოდათ, ეს მომენტი საყვარელი და სასაცილო ყოფილიყო, თუმცა ამის მაგივრად მსოფლიოს კიდევ ერთხელ ანახეს, თუ რამდენად მოწყვეტილები არიან კარდაშიან-ჯენერები რეალობას.

"ცოტა ხნის წინ ტიკტოკზე ვიდეო ვნახე, თუ როგორ ცდილობს კენდალ ჯენერი კიტრის დაჭრას და ეს ყველაზე სამარცხვინო რამაა, რაც კი ცხოვრებაში მინახავს"

"ყოველთვის ვიცოდი, რომ კარდაშიანები რეალობას მოწყვეტილნი იყვნენ, თუმცა იმის ნახვა, თუ როგორ ცდილობს კენდალი კიტრის დაჭრას, ჩემთვის ზედმეტი აღმოჩნდა"

"კენდალ ჯენერის მიერ კიტრის დაჭრა, მგონი, ყველაზე ტრაგიკული რამაა, რაც კი ოდესმე მინახავს"

კენდალმა ერთ-ერთი მომხმარებლის პოსტი გადატვიტა და "ტრაგიკული" დააწერა, რამაც სხვა მომხმარებლების გაღიზიანება კიდევ ერთხელ გამოიწვია. მათ კენდალს უსაყვედურეს, რომ სიმდიდრეში გაზრდილი იმდენად პრივილეგირებულია, რომ ბოსტნეულის დაჭრის სწავლის აუცილებლობა არასდროს ჰქონია და ამას ვერც ხვდება.