ქართული ოცნების თავმჯდომარე ირაკლი კობახიძე პარტიის დამფუძნებლის და ექსპრემიერის წერილს აფასებს. მისი თქმით, წერილმა სერიოზული კითხვები გააჩინა, თუმცა სიღრმეებში შესვლა არ უნდათ.

რატომ არის მნიშვნელოვანი: ივანიშვილმა დღეს პოლიტიკიდან წასვლის შემდეგ მეორე საჯარო განცხადება გაავრცელა.

  • ექსპრემიერი საუბრობს ისეთ თემებზე, როგორიცაა ხელისუფლების მუშაობა, ელჩთან სავარაუდო შეხვედრა და დავა შვეიცარიულ ბანკთან.
  • ის იმეორებს მმართველი გუნდის ანტიდასავლურ ნარატივს ომში ჩათრევის მცდელობაზე.
  • ივანიშვილი არ ეხმაურება ევროკომისიის რეკომენდაციებს და ჩანაწერს დეოლიგარქიზაციაზე.

კობახიძის თქმით, კულისებში ხდება იმაზე მეტი, ვიდრე ამაზე საჯაროდ საუბრობენ.

  • "ამ შემთხვევაში, ბევრი რამ არის ნათქვამი ამ წერილით, ბევრი რამ იკითხება ამ წერილიდან, მათ შორის ქვეტექსტებიც ძალიან მკაფიოა", — ამბობს ის, თუმცა არ საუბრობს კონკრეტულად რა ქვეტექსტებს გულისხმობს.
  • კობახიძე "სიღრმეებში შესვლისგან" თავს იკავებს და ამბობს, რომ საზოგადოებამ ივანიშვილის წერილისგან დასკვნები თავად უნდა გამოიტანოს.

ნარატივი ომში ჩათრევაზე: პარტიის თავმჯდომარე ივანიშვილის მსგავსად კვლავ იმეორებს ომში ჩართვის ნარატივს და ბრალს ამჯერადაც ოპოზიციურ პარტიებს, პოლიტიკოსებს, არასამთავრობო ორგანიზაციებს, უკრაინის ხელისუფლებას და "ოპოზიციის ლობისტებს" სდებს.

  • "რისკები, ბუნებრივია, რჩება გარკვეულწილად, ვიდრე ომი მიმდინარეობს უკრაინაში. აქედან გამომდინარე, თავისთავად ბატონი ბიძინას მოწოდება, რომ უნდა ვიყოთ ფრთხილად და ფხიზლად როგორც ხელისუფლება, ასევე საზოგადოება, აბსოლუტურად რელევანტურია".