პატიმრობაში მყოფი სუს-ის უფროსის ყოფილი მოადგილე, სოსო გოგაშვილი მორიგ წერილს ავრცელებს, სადაც ბიძინა ივანიშვილის დავალებით შესრულებულ უკანონო საქმეებზე საუბრობს.

რატომ არის მნიშვნელოვანი: წერილში საუბარია შს მინისტრის ყოფილ მოადგილეზე, გელა ხვედელიძეზე ძალადობაზე, რომელსაც 2017 წელს საკუთარ სახლთან თავს დაესხნენ.

  • მაშინ ხვედელიძე ეჭვობდა, რომ გოგაშვილს შეეძლო მასზე თავდასხმის დაგეგმვა, რადგან იგი სხვადასხვა მნიშვნელოვანი ინფორმაციის მატარებელია.

გოგაშვილის თქმით, ხვედელიძის "ტელეფონზე ბიძინას გინების გამო" ფარცხალაძის "ბანდამ" სცემა.

  • ის ამბობს, რომ ცემის ფაქტები ოპერატიულ-ტექნიკურმა დეპარტამენტმა "გააქრო".

გარდა ამისა, გოგაშვილმა სხვა არაკანონიერ საქმეებზეც ისაუბრა. მათ შორისაა აფგან მუხთარლის გატაცება და, სავარაუდოდ, გომელაურის დავალებით შვილის საქმროს ეთნიკურობის გამო გატაცება და წამება.

არქივიდან: გელა ხვედელიძე შინაგან საქმეთა სამინისტროში ირაკლი ღარიბაშვილის მინისტრობისას მუშაობდა.

  • 2013 წლის მაისში ის დააკავეს ერთ-ერთი მოქალაქის პირადი ცხოვრების ამსახველი კადრების გავრცელების ბრალდებით.
  • ხვედელიძე თავდაპირველად ბრალს აღიარებდა, მოგვიანებით კი მან ჩვენება შეცვალა.
  • ბრალდებულმა მაღალჩინოსანმა საპატიმრო მაშინ გირაოს საფუძველზე დატოვა, მოგვიანებით, ის სასამართლომ დამნაშავედ სცნო წარდგენილ ბრალდებაში და ერთწლიანი პირობითი სასჯელი მიუსაჯა.