ამერიკელი ნიკოლას ბოსტიკი 25 წლის კურიერია, რომელმაც ცოტა ხნის წინ საზოგადოებისგან გმირის წოდება დაიმსახურა. ნიკოლასმა შუაღამით შემთხვევით ორსართულიან ცეცხლმოკიდებულ სახლს ჩაუარა. ტელეფონი თან არ ჰქონდა, რომ 911-ში დაერეკა, ამიტომ გადაწყვიტა, სახლში შესულიყო და გაერკვია, ვინმეს დახმარება ხომ არ სჭირდებოდა.

ის სახლში უკანა კარიდან შევიდა და დაიძახა, რათა გაეგო, იყო თუ არა ვინმე შინ. როგორც აღმოჩნდა, სახლში 5 ბავშვი იმყოფებოდა, რომელთა შორის ყველაზე უფროსი 18-ის იყო. ნიკოლასის ყვირილმა ერთ-ერთი ბავშვი გააღვიძა. ნიკოლასმა 4 ბავშვი გამოიყვანა, თუმცა მალევე გაიგო, რომ მეხუთე კვლავ სახლში იყო.

ნიკოლასი სახლში შებრუნდა და 6 წლის ბავშვის ძებნა დაიწყო. ეს იმაზე რთული იყო, ვიდრე წარმოედგინა, რადგან სახლი კვამლით იყო სავსე და ირგვლივ ყველგან ცეცხლი იყო. "არ ვიცი, სხვანაირად როგორ ავხსნა, მაგრამ იქ გავაცნობიერე, რომ, დიდი ალბათობით, მოვკვდებოდი", — იხსენებს ის.

საბედნიეროდ, მეხუთე ბავშვი იპოვა, თუმცა ხანძარს სახლიდან გასასვლელი გზა მოეჭრა. ნიკოლასს სხვა გზა არ ჰქონდა — მეორე სართულის მინა ჩაამტვრია, ბავშვი ხელში აიყვანა და მასთან ერთად ფანჯრიდან გადმოხტა.

ამასობაში სახლთან მაშველები და მეხანძრეები მოვიდნენ. სწორედ მაშველის კამერამ დააფიქსირა, თუ როგორ მორბის მაშველებისკენ ბავშვით ხელში. ნიკოლასმა ჟანგბადი მოითხოვა, შემდეგ კი მათ გამუდმებით ეკითხებოდა, პატარას რამე ხომ არ დაშავებოდა. საბედნიეროდ, ნიკოლასი ფანჯრიდან ისე გადმოხტა, რომ ბავშვი არ დაშავებულა. თავად ნიკოლასმა ხელი, კოჭი და ზურგი დაიზიანა.

ბავშვების მშობლებს სახლი დამწვარი დახვდათ, თუმცა, საბედნიეროდ, ბავშვებსა და ოჯახის ძაღლს არაფერი დაშავებიათ. მშობლების თქმით, ნიკოლასს უკვე ოჯახის წევრად თვლიან.

ფოტო: City of Lafayette

ნიკოლასმა გმირის წოდებაც დაიმსახურა და მას მალე ქალაქიც დააჯილდოვებს. დაშავებული ნიკოლასის სამკურნალოდ ადამიანებმა უკვე $100 000-ზე მეტი ააგროვეს.

"მე გმირი არ ვარ. უბრალოდ სწორ ადგილას სწორ დროს და, ალბათ, სწორი ადამიანიც აღმოვჩნდი", — ამბობს ნიკოლასი.