დღეს ენერგეტიკის მინისტრმა კახა კალაძემ ბრიფინგი გამართა, სადაც განაცხადა, რომ სოფელ ჭართალისა და მუგუდის მოსახლეობის პროტესტი, მაღალი ძაბვის გადამცემი ხაზების მონტაჟთან დაკავშირებით, დესტრუქციული ძალების მიერაა პროვოცირებული.

კალაძემ ჟურნალისტის კითხვაზე დააზუსტა, რომ დესტრუქციულ ძალებში არასამთავრობოებს გულისხმობს:

"ესენი არიან ის არასამთავრობო ორგანიზაციები, რომლებიც მაქსიმალურად ცდილობენ იქ მყოფი მოსახლეობის აბუნტებას და შეცდომაში შეყვანას. ისინი შვილმკვდარი დედის ტრაგედიიის გამოყენებას ცდილობენ თავისი ბოროტი ზრახვებისთვის".

შეგახსენებთ, რომ სოფელ ჭართალისა და მუგუდის მოსახლეობა 13 მაისს გამართულ აქციაზე აცხადებდა, რომ ელექტროსადენების მონტაჟისთვის ადგილობრივი სასაფლაოს გადათხრა იყო საჭირო. საზოგადოებრივი მაუწყებლის ინფორმაციით, ადგილზე სამუშაოების წარმოებას აპროტესტებდა მეზობელ სოფელ ხანდოში მცხოვრები ნინო წიკლაურიც, რომლის შვილიც აფხაზეთში დაიღუპა.

კახა კალაძე საფლავების გათხრასთან დაკავშირებულ ინფორმაციას სიცრუეს უწოდებს. მისი თქმით, პროექტი, რომელიც ქსანი-სტეფანწმინდის დამაკავშირებელი 500 კვ-იანი ელექტროგადამცემი ხაზის მშენებლობას გულისხმობს, საქართველოსთვის მნიშვნელოვანია.