შინაგან საქმეთა სამინისტროს განცხადებით, ისინი ადმინისტრაციულ სამართალდარღვევათა კოდექსის 173-ე მუხლით დააკავეს, რაც პოლიციის მოთხოვნისადმი დაუმორჩილებლობას გულისხმობს.

რატომ არის მნიშვნელოვანი: პრორუსულ ძალადობრივ ჯგუფს, ალტ-ინფოს და მათ მხარდამჭერებს თბილისი პრაიდის კვირეულის ფარგლებში მიმდინარე ფესტივალის ჩაშლა სურთ.

• ისინი გუშინდელი საღამოს შემდეგ ცდილობენ გზების გადაკეტვას და ძალების მობილიზებას.
• მათ ხალხი რეგიონებიდან ჩამოიყვანეს და დღეს ევროკავშირის ოფისთან ანტიევროპული, ჰომოფობიური აქცია გამართეს.

დეტალები: ჰომოფობების ნაწილი რუსთაველის გამზირზე იყო შეკრებილი, სადაც ლგბტ დროშა დახიეს და დაწვეს.

• ამის შემდეგ ისინი ქართული ოცნების ოფისთან გადავიდნენ, დახეული ნაჭრები დაყარეს და ყვიროდნენ: "ქათმებო", "ნაციონალებო".
• იქედან დაბრუნებულები EU-ს წარმომადგენლობასთან ავიდნენ, სადაც დაწვეს ევროკავშირის და ნატოს დროშები და ელჩს შეურაცხმყოფლად მოიხსენიებდნენ — ვაკეში მათ ხალხი ფანჯრებიდან აკრიტიკებდა და აგინებდა.
• პრორუსების ნაწილი კი სხვა ტერიორიაზე იყო მობილიზებული და ცდილობდა, ფესტივალზე მიმსვლელებისთვის ხელი შეეშალა — სწორედ იქ დააკავა პოლიციამ 17 პირი.

მოძალადეები გუშინაც დააკავეს, სულ 26 ადამიანი. კერძოდ, ალტ-ინფოს წევრები ზურაბ მახარაძე და ირაკლი მარტინენკო. ასევე, მამა-შვილი ფალავანდიშვილები და ბექა ვარდოსანიძე.

• ბოლო რამდნეიმე კვირაა ისინი თბილისი პრაიდს ემუქრებოდნენ და ძალადობა არაერთხელ დააანონსეს.
• შეგახსენებთ, რომ 2021 წელს პოლიციამ რუსთაველის გამზირზე, სადაც ღირსების მარში იყო დაგეგმილი, შეკრებილი მოქალაქეები სათანადოდ ვერ დაიცვა.
• სწორედ ამ ჯგუფებმა დააორგანიზეს ძალადობა და დაარბიეს აქტივისტების ოფისები, ფიზიკურად გაუსწორდნენ 50-ზე მეტ ჟურნალისტზე — 5 ივლისს ნაცემი ოპერატორი ლექსო ლაშქარავა გარდაიცვალა.

შსს-ს განცხადებით, მათი თანამშრომლები თბილისი პრაიდის კვირეულის ფარგლებში დაანონსებულ ღონისძიებებთან და "საპროტესტო აქციებთან" დაკავშირებით მობილიზებული არიან და იცავენ საზოგადოებრივ წესრიგს, ასევე "ყველა მოქალაქის შეკრებისა და გამოხატვის თავისუფლებას".

• უწყებაში ამბობენ, რომ პრაიდფესტივალის უსაფრთხო გარემოში ჩატარების მიზნით, აგრძელებენ კომუნიკაციას ორგანიზატორებთან, ასევე, გამოხატვის თავისუფლების დაცვის უზრუნველსაყოფად, ტარდება პრევენციული ღონისძიებები.

თბილისი პრაიდის დასკვნითი ღონისძიება, პრაიდფესტივალი დღეს იმართება. აქამდე ჩატარდა კინოჩვენება და რეგიონალური ლგბტ კონფერენცია.

• მიუხედავად იმისა, რომ წელს ღირსების მარში არ იმართება და ფესტივალი დახურულ სივრცეშია, ჰომოფობები მაინც ცდილობენ მოქალაქეების გამოხტვის თავისუფლება შეზღუდონ და პრაიდფესტივალს უპირისპირდებიან.
• გაიგეთ მეტი პრაიდის კვირეულზე აქ.