დისნეის ანიმაცია ჰერკულესის მიხედვით ფილმს გაი რიჩი გადაიღებს

ალადინის ფილმის გადაღების შემდეგ რეჟისორმა გაი რიჩიმ დისნეის კიდევ ერთ ანიმაციაზე შეაჩერა არჩევანი — ამჯერად ჰერკულესის ფილმს ვიხილავთ. 1997 წელს გამოსული ანიმაცია დისნეის ერთ-ერთი ყველაზე პოპულარული ნამუშევარია.

ჰერკულესის ახალ ფილმზე Avengers: Endgame-ის შექმნაში ჩართული კომპანია AGBO იმუშავებს. ჯერჯერობით უცნობია, ვიხილავთ თუ არა თავდაპირველი ისტორიისგან განსხვავებულ დეტალებს ახალ ფილმში. არც ის ვიცით, მოვისმენთ თუ არა ჩვენს საყვარელ სიმღერებს.

"აშკარაა, რომ ხალხი მიჯაჭვულია თავდაპირველ სიმღერებზე, ეს მათი დნმ-ის ნაწილია, ამიტომ არ გვინდოდა, რომ თავდაპირველი დეტალები რადიკალურად შეგვეცვალა", — განაცხადა გაი რიჩიმ 2018 წელს ალადინის ფილმის შესახებ.

სიუჟეტსა და სიმღერებზე არანაკლებ მაყურებელს კიდევ ერთი რამ აინტერესებს: ვინ შეასრულებს ჰერკულესისა და მეგის როლს?

დისნეიმ 2020 წელს დაადასტურა, მულანის, ურჩხული და მზეთუნახავისა თუ ალადინის შემდეგ თავისი კიდევ ერთი საკულტო ანიმაციის — ჰერკულესის მიხედვით ფილმს გადაიღებს.

ჰერკულესი 1997 წელს გამოსული მუსიკალური ანიმაციაა, რომელიც ბერძნული მითოლოგიის მოტივებზე ღვთაებრივი გმირის — ჰერკულესის შესახებ მოგვითხრობს. ანიმაციის ძირითადი სიუჟეტური ხაზი სწორედ ამ გმირის ირგვლივ ვითარდება, რომელიც დედამიწაზე ადამიანებთან ერთად ცხოვრობს და მრავალი საშიში დაბრკოლების გადალახვა მოუწევს, რათა დაამტკიცოს, რომ ოლიმპოს მთაზე ღმერთებთან ერთად ცხოვრების ღირსია.

ამ ანიმაციის რეჟისორები რონ კლემენტსი და ჯონ მასკერი არიან, რომელთაც ემოციური სიუჟეტითა და შთამბეჭდავი ვიზუალით შეძლეს მილიონობით მაყურებლის გული მოეგოთ: $85-მილიონიანი ბიუჯეტით კინოგაქირავებაში ჰერკულესის შემოსავლებმა $252 მილიონი შეადგინა.

რაც შეეხება გაი რიჩს, მას ალადინთან ერთად სხვა რამდენიმე წარმატებული პროექტის რეჟისორიცაა, რომელთა შორისაცაა შერლოკ ჰოლმსის ფილმები და ჯენტლმენები (The Gentlemen).