საქართველოს ეკონომიკისა და მდგრადი განვითარების მინისტრი, გიორგი გახარია ამბობს, რომ მაღაროში გარდაცვლილთა ოჯახები მთავრობისგან და კომპანიისგან კომპენსაციას მიიღებენ. ამის შესახებ ინფორმაციას საზოგადოებრივი მაუწყებელი ავრცელებს.

„ჩატარდება ღია გამოძიება, რომლის შედეგების შესაბამისადაც, ყველა დამნაშავე პირი დაისჯება. დღეს არ არის მომენტი, ვეძებოთ მტყუან-მართალი, მაქსიმუმი უნდა გავაკეთოთ, რომ დაზარალებულების ოჯახებს ტრაგიკული ფაქტით გამოწვეული ტკივილი შევუმსუბუქოთ,“- განაცხადა გახარიამ.

9 მაისს საღამოს სიმაღლიდან გადავარდნილი მეშახტეების შესახებ ინფორმაცია გავრცელდა. ადამიანი უფლებათა სწავლებისა და მონიტორინგის ცენტრის წარმომადგენელი, ლინა ღვინიანიძე, ფეისბუკზე წერდა, რომ, სავარაუდოდ, მწყობრიდან გამოსული ტექნიკის გამო ოთხი მუშა სიმაღლიდან გადავარდა.

გუშინვე, ღამით, თბილისის პარლამენტის შენობასთან მაღაროელების მხარდასაჭერად აქცია გაიმართა. აქციის მონაწილე სამი პირი შინაგან საქმეთა სამინისტროს თანამშრომლებმა ადმინისტრაციული წესით დააკავეს.