იაპონიის სკოლების სასადილოებში ორი წლის განმავლობაში თითქმის სამარისებური სიჩუმის შემდეგ, მოსწავლეებს კვლავ დართეს ნება, ჭამის დროს ერთმანეთთან ისაუბრონ. გადაწყვეტილების მიღების საფუძველი ქვეყანაში კოვიდშემთხვევების შემცირებაა.

პანდემიის დროს იაპონიის დაწყებითი და საბაზო სკოლების მოსწავლეებს სადილობისას ლაპარაკი ეკრძალებოდათ, რათა დაავადება ასე არ გავრცელებულიყო. თუმცა, ეპიდსიტუაციის შემსუბუქების შემდეგ, ქვეყნის მასშტაბით ბევრი სკოლა შეთანხმდა, რომ მოკუშოკუ — ჩუმად ჭამის კულტურა — ბავშვის სოციალურ განვითარებას აფერხებდა.

ამ შეზღუდვის რამდენიმე პრეფექტურაში მოხსნის მიუხედავად, მოსწავლეებს პირბადის ტარება მაინც მოუწევთ, როცა იტადაკიმასუს — სადილობამდე მადლობის გამოხატვას — დააპირებენ.

გადაწყვეტილების მიღებას დადებითად შეხვდნენ მასწავლებლები, თუმცა, მშობლების აზრი ორად გაიყო. ზოგიერთის აზრით, ამ შეზღუდვის მოხსნა ნაადრევია.

სკოლების ხელმძღვანელობებს ასევე დაევალათ, ინდივიდუალური მიდგომით განსაზღვრონ პირბადის ტარების ვალდებულება ფიზიკური აღზრდის გაკვეთილებზე. ეს მითითება მას შემდეგ გახდა საჭირო, რაც რამდენიმე ბავშვი ვარჯიშის დროს პირბადის ტარების გამო შეუძლოდ გახდა. ამიტომ, განათლების მინისტრმა, შინსუკე სუემაცუმ, განაცხადა, რომ მოსწავლეებს სკოლისკენ მიმავალ და დასაბრუნებელ გზაზე, ასევე ფიზიკური აღზრდის გაკვეთილებზე პირბადის მოხსნა შეუძლიათ.