ევროპარლამენტარები, რასა რასა იუკნევიჩიენე და ანდრიუს კუბოლიუსი საქართველოს მოსახლეობასა და პოლიტიკურ პარტიებს ღია წერილით მიმართავენ. მათი განცხადებით, საქართველოსთვის კანდიდატის სტატუსის მიღებაზე ევროკავშირის გადაწყვეტილების პროგნოზირება რთულია, თუმცა პოლიტიკურ პარტიებსა და საქართველოს მოსახლეობას "ნაკლებად პოზიტიური შედეგის" შემთხვევაში იმედი არ უნდა გაუცრუვდეთ.

"ივნისის შუა რიცხვებში ევროკომისია უკრაინის, მოლდოვასა და საქართველოსთვის ევროკავშირის კანდიდატი ქვეყნის სტატუსის შესახებ რეკომენდაციებს გამოაქვეყნებს. ივნისის ბოლოს ევროკავშირის წევრი ქვეყნების მთავრობები ევროსაბჭოში საბოლოო გადაწყვეტილებას მიიღებენ.

ამ პროცესის შედეგის პროგნოზირება რთულია. ამ ღია წერილით ჩვენ გვინდა მოვუწოდოთ ქართულ პოლიტიკურ ძალებსა და ქართველ ხალხს, იმედგაცრუებულნი არ დარჩნენ, თუ შედეგი ნაკლებად ოპტიმისტური იქნება. ნაცვლად ამისა, გააერთიანონ ძალები საქართველოს ევროკავშირში გაწევრიანებისთვის", — ნათქვამია წერილში.

განცხადების ავტორები აღნიშნავენ, რომ საქართველოში "ოლიგარქიზაციისა" და "პოლარიზაციის" დონე მაღალი რჩება, ძალაუფლება კი ერთი ადამიანის ხელშია მოქცეული, ადამიანის, რომელიც "დემოკრატიული არჩევნებით ხალხის წინაშე ანგარიშვალდებული არ არის".

"საქართველოს ყოფილი პრეზიდენტი ციხეშია. ყველას გახსოვთ, როგორ იმოქმედა უკრაინის ევროკავშირთან დაახლოებაზე, ყოფილი პრემიერმინისტრის იულია ტიმოშენკოს დააპატიმრამ და აქედან შესაძლებელია დასკვნის გამოტანა.

სამწუხაროდ, ევროკავშირის უმაღლესი დონის უპრეცედენტო მცდელობის მიუხედავად, ხელი შეუწყოს საქართველოში პოლიტიკური ჩიხური სიტუაციის მოგვარებასა და პროევროპული დღის წესრიგის წინ წამოწევას, შარლ მიშელის შეთანხმება ამ დრომდე არ განხორციელებულა. უფრო მეტიც, მაშინ, როდესაც საქართველოსთვის კანდიდატის სტატუსის შესახებ ევროკომისიამ რეკომენდაციების შემუშავება დაიწყო, სასჯელი გამოუტანეს ხელისუფლების მიმართ კრიტიკული მედიის მფლობელს, რამაც კიდევ ერთი ბნელი ლაქა შესძინა საქართველოს სურათს", — ამბობენ ისინი.

ევროპარლამენტარების შეფასებით, ძნელად გასაგებია მმართველი პარტიის პოზიცია უკრაინისა და ევროკავშირის მიერ რუსეთისთვის დაწესებულ სანქციებთან დაკავშირებით. ამასთან, აღნიშნავენ, რომ უკრაინელები არა მხოლოდ საკუთარ მიწას, არამედ დემოკრატიას, თავისუფლებასა და ევროპულ ღირებულებებსაც იცავენ, რაც საქართველოსთვისაც მნიშვნელოვანია.

"ხანდახან არ შეიძლება არ ვიფიქროთ, რომ მმართველ წრეში ვიღაც აქტიურად აკეთებს ყველაფერს, რათა საქართველო ევროკავშირში არ გაწევრიანდეს. თუ ისინი წარმატებას მიაღწევენ, ეს იქნება საშინელი დანაკარგი არა მხოლოდ საქართველოსთვის, არამედ ევროკავშირისთვისაც და დიდი გამარჯვება პუტინის რეჟიმისთვის", — ვკითხულობთ წერილში.

ევროპარლამენტარები დასძენენ, რომ ევროკომისია ყოველთვის ითვალისწინებს სრულ სურათს განმცხადებელი ქვეყნის მზადყოფნასთან დაკავშირებით. ისინი აღნიშნავენ, რომ დემოკრატია, კანონის უზენაესობა და ადამიანის უფლებების პატივისცემა ისევე მნიშვნელოვანია, როგორც სამართლებრივი და ეკონომიკური შესაბამისობა ევროკავშირის კანონმდებლობასთან.