ცნობილმა ტელევარსკვლავმა და მოდელმა კიმ კარდაშიანმა The New York Times-ისთვის მიცემულ ინტერვიუში თავის ახალ ბრენდზე ისაუბრა და იმასაც შეეხო, თუ რამდენად მნიშვნელოვანია მისთვის ახალგაზრდული გარეგნობა.

"ამისთვის ყველაფერს ვცდიდი", — ამბობს 41 წლის ვარსკვლავი, — "თუკი მეტყოდით, რომ ყოველდღე განავალი უნდა ვჭამო, რათა უფრო ახალგაზრდულად გამოვიყურებოდე, შეიძლება ასეც მოვქცეულიყავი. შეიძლება".

ფოტო: RODIN ECKENROTH/GETTY IMAGES

გარეგნობაზე ზრუნვისას უკიდურესი ზომებისთვის ტელევარსკვლავს წინათაც მიუმართავს. ცოტა ხნის წინ კარდაშიანმა განაცხადა, რომ მეთ გალაზე მერილინ მონროს მსგავსი კაბის მოსარგებად მკაცრი დიეტა დაიცვა და 3 კვირაში 7 კილოგრამი დაიკლო. ამ განცხადებისა და "წონის არაჯანსაღი კლების პოპულარიზების" გამო იგი ინტერნეტში უამრავმა ადამიანმა გააკრიტიკა, მათ შორის, დიეტოლოგებმაც.

თუმცა, კრიტიკა არც კიმბერლისა და არც მისი ოჯახისთვის უცხო არაა — კარდაშიან-ჯენერების დებს ხშირად ადანაშაულებენ სილამაზის სტერეოტიპული სტანდარტების პოპულარიზებაში. რამდენიმე თვის წინ კიმი ასევე გააკრიტიკეს ფოტოშოპის გამოყენებისთვის, ხოლო ცოტა ხნის წინ მის მიერ შექმნილ კამპანიაში "ყველას ერგება" (Fits Everybody) სახეებად მხოლოდ სუპერმოდელები გამოიყვანეს.