ცოტა ხნის წინ Juno-სა და The Umbrella Academy-ის ვარსკვლავმა ელიოტ პეიჯმა გამოცემა Esquire-თან საკუთარ ცხოვრებასა და გამოცდილებაზე ისაუბრა. ელიოტმა გულშემატკივრებს გაუმხილა, თუ რამდენად რთული აღმოჩნდა მისთვის შემთხვევა, როცა ფილმ Juno-ს პრემიერაზე კაბის ჩაცმა აიძულეს.

ელიოტ პეიჯმა მსოფლიოს პირველად 2020 წლის დეკემბერში განუცხადა, რომ ტრანსგენდერია და სახელიც შეიცვალა — მანამდე ელენი ერქვა. ჯუნოს პრემიერა ელიოტის დაქამინგაუთებამდე დიდი ხნით ადრე გაიმართა, თუმცა მსახიობი თავს ქუსლებსა და კაბაში მაშინ ძალიან ცუდად გრძნობდა.

ელიოტის თქმით, უნდოდა, მნიშვნელოვან ღონისძიებაზე შესაფერისი შარვალ-კოსტიუმით მისულიყო, თუმცა Fox Searchlight-ის წარმომადგენლებმა მას ამის ნება არ დართეს და კაბის ჩაცმა აიძულეს.

"ვთქვი, რომ კოსტიუმის ჩაცმა მინდოდა, Fox Searchlight-ში კი მიპასუხეს: 'არა, კაბა უნდა ჩაიცვა'. მათ კაბის ჩაცმა დამაძალეს და ამით დამთავრდა ყველაფერი", — გაიხსენა მსახიობმა.

ელიოტ პეიჯის თქმით, სულერთია, ადამიანი ტრანსგენდერია თუ ცისგენდერი — მისთვის იმ ტანსაცმლის ჩაცმის დაძალება, რომელშიც თავს ცუდად გრძნობს, მიუღებელია.

"ხალხისთვის მარტივია, ამაზე თვალები აატრიალოს, მაგრამ იცით, რას გეტყვით? არა. ძალიან, ძალიან ამაზრზენი იყო. მნიშვნელობა არ აქვს იმას, რომ ტრანსგენდერი ვარ. სულერთია, ტრანსგენდერი ვარ თუ ცისგენდერი. უამრავ ცისგენდერ ქალს მოსწონს ისე ჩაცმა, როგორც მე ვიცვამ", — განაცხადა ელიოტმა.

2007 წლის ფილმი ჯუნო ელიოტ პეიჯის კარიერისთვის გარდამტეხი აღმოჩნდა. მსახიობმა როლისთვის ოსკარის ნომინაციაც კი მოიპოვა.