BBC-მ ეკრანზე შეცდომით გამოჩენილი წარწერის გამო ინგლისური საფეხბურთო კლუბის, მანჩესტერ იუნაიტედის, ფანებს მოუბოდიშა. საქმე ისაა, რომ ეთერში სპორტული სიახლეების ჩვენების დროს ეკრანის ქვედა ნაწილში, საინფორმაციო ტიკერზე, დაიწერა "მანჩესტერ იუნაიტედი ნაგავია".

მოგვიანებით, იმავე დღეს, ტელეარხის წამყვანმა ფეხბურთის ფანებს, რომლებმაც თავი შეურაცხყოფილად იგრძნეს, ბოდიში მოუხადა და სიტუაციის ახსნა სცადა.

"ეთერს მიღმა ვიღაც საინფორმაციო ტიკერს და მასზე ტექსტის განთავსებას სწავლობდა", — ჰყვება წამყვანი ანიტა მაკვეი, — "ამიტომ, შემთხვევით რაღაცებს არასერიოზულად წერდნენ. ასე მოხვდა კომენტარი ეკრანზე. ამდენად, ბოდიშს გიხდით, თუ თქვენ ეს დაინახეთ და თავი შეურაცხყოფილად იგრძენით".

ოფიციალური განცხადება გაავრცელა BBC-მაც და აღნიშნა, რომ ტექნიკური შეცდომა უნებლიეთ გაიპარა პირდაპირ ეთერში. თუმცა კი, ინტერნეტში ამ შემთხვევაზე მაინც იხალისეს. ტელეარხის წამყვანმა და მანჩესტერ სიტის ფანმა კლაივ მაირიმ ტვიტერზე მაშინვე დაწერა, რომ თავად "არაფერ შუაში იყო".

აღსანიშნავია, რომ მსოფლიოში ცნობილი საფეხბურთო კლუბი მანჩესტერ იუნაიტედი, რომელსაც საქართველოშიც ბევრი ფანი ჰყავს, ბოლო სეზონების განმავლობაში მაინცდამაინც დიდი წარმატებით არ გამოირჩევა.