რუსეთის პრეზიდენტი, ვლადიმერ პუტინი აცხადებს, რომ დაელაპარაკება გენერალურ პროკურორსა და რუსეთის შს მინისტრს ჩეჩნეთში ჰომოსექსუალებთან დაკავშირებულ სიტუაციაზე. ამის შესახებ პუტინმა სახალხო დამცველთან, ტატიანა მოსკალკოვასთან საუბარისას განაცხადა. ინფორმაციას რუსული გამოცემა ნოვაია გაზეტა ავრცელებს.

შეხვედრაზე ომბუდსმენმა პუტინს რუსეთში ადამიანის უფლებების მდგომარეობის ყოველწლიური ანგარიში წარუდგინა და განსხვავებული სექსუალური ორიენტაციის ადამიანების პრობლემებზე გაამახვილა ყურადღება.

"უბრალოდ ვიტყოდი, რომ, რა თქმა უნდა, გავესაუბრები გენერალურ პროკურორსა და შს მინისტრს იმაზე, რომ მხარი დაგიჭირონ იმ თემაზე, რომელიც ახლა წამოწიეთ, ცნობილ ინფორმაციასა თუ ჭორებზე, ასე ვთქვათ, იმაზე, რაც ხდება ჩრდილოეთ კავკასიაში არატრადიციული სექსუალური ორიენტაციის ადამიანების მიმართ. იმედი მაქვს, კოლეგები დაგეხმარებიან," - განაცხადა პუტინმა.

ერთ თვეზე მეტია, რაც ნოვაია გაზეტამ ჩეჩნეთის ხელისუფლების მიერ გეების მასობრივი დაკავებებისა და მკვლელობების შესახებ ინფორმაცია გამოაქვეყნა. ლგბტ თემის წევრებმა მათ მიმართ მიმდინარე დევნაზე CNN-თან ისაუბრეს. ლგბტ ადამიანების მიმართ ჩადენილი დანაშაულის გამოძიებას მოითხოვს გაერო.