რუსეთში მცხოვრები კრემლის პროპაგანდისტი, ეთნიკურად ქართველი ჟურნალისტი და ტელეწამყვანი თინა კანდელაკი საქართველოს ხელისუფლების დღევანდელ პოზიციას იწონებს. ის ოკუპანტ ქვეყანასთან ურთიერთობის "ნორმალიზების" ნაბიჯების გადადგმაზე და საქართველოს მოქალაქეებისთვის უვიზო რეჟიმის შემოღებაზე საუბრობს.

კანდელაკმა საკუთარ ტელეგრამზე საქართველოს დიდი პოსტი მიუძღვნა, თუმცა წინა ხელისუფლების კრიტიკის ჭრილში. კრემლის პროპაგანდისტის მტკიცებით, ბოლო წლებში "კარგი სიახლეები" არ ყოფილა და ყველა მსგავსი ინციდენტის, მათ შორის, პოზნერის დაბადების დღის "ჩაშლის" უკან "სააკაშვილის ყოფილი მმართველი პარტია დგას". კანდელაკი საქართველოს დღევანდელი ხელმძღვანელობის პოზიციას "გაწონასწორებულს" უწოდებს და იმასაც ამატებს, რომ ამ ფაქტით "სასიამოვნოდ გაოცებულია".

საქართველოს მთავრობის პოზიციები აქამდე კრემლის სხვა პროპაგანდისტებსაც მოუწონებიათ, მათ შორის, მარგარიტა სიმონიანს. მან 26 აპრილს განაცხადა, რომ ახლანდელი მთავრობა ამ სიტუაციაში "გასაოცრად ადეკვატურად იქცევა".

მანამდე სიმონიანმა პრემიერმინისტრის, ირაკლი ღარიბაშვილის განცხადება მოიწონა. მან ფეისბუქგვერდზე გააზიარა RT-ს დაწერილი ღარიბაშვილის ციტატა იმის შესახებ, რომ საქართველო არ აპირებს რუსეთს უკრაინისადმი აგრესიის გამო სანქციები დაუწესოს და დააწერა: "მეგობრებო, საქართველო გამოჯანმრთელდა".