შინაგან საქმეთა სამინისტროს განცხადებით, თბილისში ნარკოდანაშაულისთვის 3 პირი დააკავეს. როგორც უწყებაში ამბობენ, ისინი "დიდი ოდენობით ნარკოტიკული საშუალების შემცველი მცენარის უკანონო დათესვა-მოყვანის, კულტივირებისა და შეძენა-შენახვისთვის" არიან დაკავებულები.

"სამართალდამცველებმა, მოსამართლის განჩინების საფუძველზე ერთ-ერთის ბინაში ჩატარებული ჩხრეკისას, განსაკუთრებით დიდი ოდენობით ნარკოტიკული საშუალება მარიხუანა და ნარკოტიკული საშუალების შემცველი მცენარის კულტივაციისთვის განკუთვნილი მოწყობილობები ნივთმტკიცებად ამოიღეს. ამავე დეპარტამენტის ისანი-სამგორის მთავარი სამმართველოს თანამშრომლებმა 2000 წელს დაბადებული პირი დიდი ოდენობით ნარკოტიკული საშუალების დათესვა-მოყვანისა და კულტივირების ბრალდებით, თბილისში დააკავეს", — ნათქვამია განცხადებაში.

როგორც შსს-ში აღნიშნავენ, ერთ-ერთი დაკავებულის ბინის ჩხრეკისას, ნივთმტკიცების სახით, ასევე, 45 შეკვრად დაფასოებული მარიხუანა, 6 ძირი კანაფი და მცენარის გასაზრდელად განკუთვნილი ე.წ კაბინაა ამოღებული.

უწყებაში აცხადებენ, გამოძიება სისხლის სამართლის კოდექსის 260-ე და 265-ე მუხლებით მიმდინარეობს. დანაშაული 4-დან 12 წლამდე ვადით თავისუფლების აღკვეთას ითვალისწინებს.