ქართული ოცნების დეპუტატის განცხადებით, არ გადააჭარბებს, თუ იტყვის, რომ საქართველოს აქვს სხვაზე მეტი შანსი. მისი თქმით, საქართველო ყოველთვის აღიქმებოდა ლიდერად რეფორმების მიმართულებით.

"როგორც იცით, ერთი ნაწილი უკვე შევსებულია კითხვარის, ჩაბარებულია, გადაცემულია. მეორე ნაწილი დაანონსდა, რომ ხვალ იქნება გადაცემული. მე ვფიქრობ, გვაქვს, არ გადავაჭარბებ, თუ ვიტყვი, რომ გვაქვს სხვაზე მეტი შანსი, იმიტომ, რომ საქართველო ყოველთვის აღიქმებოდა ლიდერად რეფორმების მიმართულებით და ამას აღნიშნავდნენ არამხოლოდ ქვეყნის შიგნით, ვთქვათ ჩვენ შეიძლება, შეფასებაში ვიყოთ ძალიან სუბიექტურები, გასაგებია — ჩვენი ქვეყნისთვისაც კარგი გვინდა, ჩვენი ხელისუფლების დამსახურებაზე, ბუნებრივია კარგს ვიტყვით. ეს ჩვეულებრივი ამბავია, ყველა სახელმწიფოს ხელისუფლება ასე აკეთებს. მაგრამ ამას აღნიშნავდნენ ჩვენი პარტნიორები ყოველთვის.

თქვენ გახსოვთ, წინა პერიოდი, როდესაც NATO-სთან, ევროკავშირთან დაახლოების გზაზე რეფორმებზე იყო ხოლმე საუბარი, საქართველოს ყოველთვის მოიხსენიებდნენ, როგორც ლიდერს რეფორმების გატარების საქმეში და ბევრი განცხადება მოგვისმენია, გახსოვს ესეც ალბათ, რომ საქართველო არასდროს ყოფილა ისე ახლოს ევროკავშირთან და NATO-სთან, როგორც ესაა დღეს. რა თქმა უნდა, ამას საქართველოში მიმდინარე პროცესებიდან გამომდინარე ასკვნიდნენ და ასეთი განცხადებები ამიტომ კეთდებოდა. აქედან გამომდინარე, ბუნებრივია, პერსპექტივა არის რეალურია, ხელშესახები. თუკი ვინმე დღეს იმსახურებს, მიიღოს კანდიდატის სტატუსი, ეს არის ჩვენი სახელმწიფო და ჩვენი სამშობლო", — აცხადებს ის.

კითხვარს საქართველოს გარდა უკრაინა და მოლდოვაც ავსებს. დღეს, 9 მაისს უკრაინამ კითხვარის მეორე ნაწილის შევსება დაასრულა. საქართველოს პრემიერმინისტრმა, ირაკლი ღარიბაშვილმა კარლ ჰარცელს ევროკავშირის კითხვარის პირველი ნაწილი 2 მაისს გადასცა. მე-2 ნაწილის გადაცემა კი 10 მაისს იგეგმება.