"თვითგამოცხადებული ქართველი მედასავლეთეებიც 8 მაისით მანიპულირებენ", — ასე პასუხობს პარლამენტის თავმჯდომარე, შალვა პაპუაშვილი კითხვას, რატომ არ აღნიშნავს საქართველო ევროპის სხვა ქვეყნების მსგავსად ფაშიზმზე გამარჯვების დღეს 8 მაისს.

"სამწუხარო რეალობაა, ვფიქრობ, დღევანდელი პოლიტიკური დისკუსიის მიერ მოტანილი. რა თქმა უნდა, რუსეთი 9 მაისით მანიპულირებს და რა თქმა უნდა, თვითგამოცხადებული ქართველი მედასავლეთეებიც 8 მაისით მანიპულირებენ, საერთო ჯამში. 9 მაისს რაც შეეხება, ეს არის იმ ხალხის დღე, რომელთან ერთადაც დღეს ვართ, ამ სკვერში. ადამიანების, რომლებმაც ეს გამარჯვება მოიტანეს.

რა თქმა უნდა, მათი დღეა ეს და შესაბამისად, ის დღე, რომელსაც ისინი ზეიმობენ, როდესაც მათ მოიტანეს გამარჯვება, არის მათი გამარჯვების დღე და ამ დღეს აღვნიშნავთ. სხვა დანარჩენი ამის გარშემო არის ინსტრუმენტალიზება, თვითონ თარიღის და რაღაც დატვირთვის მიცემა თარიღებისთვის", — განაცხადა მან.

დღეს, 9 მაისს ფაშიზმზე გამარჯვების აღსანიშნად ვეტერანები კიკვიძის ბაღში შეიკრიბნენ. ადგილზე მივიდნენ მთავრობის წარმომადგენლებიც, მათ შორის, პრემიერმინისტრი, ირაკლი ღარიბაშვილი. კითხვას, თუ რატომ არ აღნიშნავს საქართველო ამ დღეს 8 მაისს, ღარიბაშვილმა არ უპასუხა და ტერიტორია დატოვა.

ამავე თემაზე: