საქართველოს პარლამენტის წევრი, მოძრაობა თავისუფლებისთვის - ევროპული საქართველოს წევრი, ხათუნა გოგორიშვილი ამბობს, რომ უზენაესი სასამართლოს თავმჯდომარე, ნინო გვენეტაძე მოსამართლეებს ემუქრება. დეპუტატის თქმით, სასამართლოს თავმჯდომარე ზეწოლით ცდილობს მოსამართლეებმა ხელისუფლებისთვის სასურველი გადაწყვეტილება მიიღონ.

"დღევანდელი უზენაესი სასამართლო და მისი თავმჯდომარე, ქალბატონი გვენეტაძე არის ყველაზე სამარცხვინო თავმჯდომარე, რაც კი ჰყოლია ოდესმე რომელიმე სასამართლოს საქართველოში," - თქვა გოგორიშვილმა პარლამენტის პლენარულ სხდომაზე.

ის საქართველოში კიდევ ერთ მოსამართლის საქმიანობას შეეხო. მისი თქმით, საკონსტიტუციო სასამართლოს თავმჯდომარე, ზაზა თავაძე ძირითადად მივლინებაშია, საქართველოში ყოფნის დროს კი - ძვირადღირებულ ავტომობილებს არჩევს.

,,ჩვენ გვყავს უზენაესი სასმართლოს სამარცხვინო თავმჯდომარე, არაფრისმაქნისი და უნიათო საკონსტიტუციო სასამართლოს თავმჯდომარე და მოგიწოდებთ, ახალი რეგულაციები, რომელიც ევა გოცირიძის მიერ არის ინიცირებული, შეგიძლიათ ჩემით დაიწყოთ და ჩემზე გამოიყენოთ,’’ - დასძინა გოგორიშვილმა.

იუსტიციის უმაღლესმა საბჭომ 26 აპრილს საჯარო განცხადება გაავრცელა. უწყება დაუშვებლად მიიჩნევს მოსამართლეთა მიმართ იმ კრიტიკულ გამონათქვამებს, რაც ბოლო პერიოდში, მათ მიმართ, რუსთავი 2-ის ეთერით ჟღერდებოდა. ამავე წერილში აღნიშნულია ისიც, რომ ეთიკური პრინციპების დარღვევის გამო, ეთიკის ქარტია არ ითვალისწინებს ჟურნალისტისთვის სანქციის დაწესებას.

ჟურნალისტური ეთიკის ქარტია მსგავს შეზღუდვებს ცენზურის დაწესების მცდელობად მიიჩნევს და აცხადებს, რომ გამოხატვის თავისუფლების არსებული სტანდარტი არავითარ შემთხვევაში არ უნდა გაუარესდეს.