აზოვსტალიდან ყველა ქალი, ბავშვი და მოხუცი ევაკუირებულია. ინფორმაციას ამის შესახებ უკრაინის ვიცე-პრემიერი ავრცელებს.

"პრეზიდენტის ბრძანება შესრულდა: აზოვსტალიდან ყველა ქალის, ბავშვი და მოხუცის ევაკუაცია განხორციელდა. მარიუპოლის ჰუმანიტარული ოპერაციის ეს ნაწილი დასრულდა", — წერს ის.

დღეს, 7 მაისს სოციალურ ქსელებში გავრცელდა დეზინფორმაცია იმის შესახებ, რომ აზოვის პოლკი, რომელიც მარიუპოლში, აზოვსტალშია გამაგრებული დანებდა. წერენ, თითქოს მარიუპოლის მცველებმა თეთრი დროშა აღმართეს და რუსებს ჩაბარდნენ.

აზოვის პოლკის პრესსამსახურმა, ეს ცნობები უარყო და განმარტა, რეალურად რისთვის იყენებენ თეთრ დროშას. მათი თქმით, ეს ევაკუაციის ნიშანია და პროცესის დაწყების დროს რუსებიც აღმართავენ.

"ორივე ჯგუფმა ასეთი დროშები გამოიყენა აზოვსტალის ქარხნის ტერიტორიიდან მოქალაქეების ევაკუაციისთვის. აღვნიშნავთ, რომ ეს პროცედურა უკვე მეოთხედ ტარდება", — განაცხადეს მათ.

აზოვსტალთან მძიმე ბრძოლები გრძელდება. მარიუპოლის მცველები დაჭრილი ჯარისკაცებისა და სამოქალაქო პირების გაყვანაში დახმარებას ითხოვენ. მოლაპარაკებების შედეგად რამდენიმეთვიანი იზოლაციის შემდეგ, მოხერხდა ასეულობით ადამიანის გაყვანა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში