საქართველოს სახალხო დამცველმა, ვეგანური კაფე "კივის" ადმინისტრაციის მიმართ, ფართის მესაკუთრის მხრიდან დისკრიმინაციული მოპყრობა დაადგინა. ომბუდსმენმა საქმე ადამიანის უფლებების სწავლებისა და მონიტორინგის ცენტრის (EMC) განცხადების საფუძველზე შეისწავლა.

ომბუდსმენმა დაასკვნა, რომ მესაკუთრის მხრიდან ქირავნობის ხელშეკრულების მოშლის რეალური მიზეზი ემყარებოდა მის სტერეოტიპულ განწყობებს კონკრეტული გარეგნობის მქონე ადამიანების მიმართ და ლგბტ ჯგუფთან მათ სავარაუდო აფილირებას:

"სახალხო დამცველმა დაადგინა, რომ ფართის მესაკუთრემ "კივის" ადმინისტრაციის მიმართ ჩაიდინა პირდაპირი დისკრიმინაცია გარეგნობის ნიშნით, ასევე ასოციაციითი დისკრიმინაცია სექსუალური ორიენტაციის ნიშნით და დისკრიმინაციის ყველა ფორმის აღმოფხვრის შესახებ საქართველოს კანონის მე-9 მუხლის მე-3 პუნქტის საფუძველზე რეკომენდაციით მიმართა, რომ სახელშეკრულებო თუ სხვა ურთიერთობებში მომავალში თავი შეიკავოს დისკრიმინაციული ქმედებებისგან," - წერია EMC-ის განცხადებაში.

2016 წლის 29 მაისს, კაფე "კივის" პერსონალს რამდენიმე ნეონაცისტმა შეურაცხყოფა მიაყენა, რის შემდეგაც ფართის მესაკუთრემ დამქირავებელს ქირავნობის ხელშეკრულების ვადამდე ადრე შეწყვეტა მოსთხოვა.