ევროპის სახალხო პარტიის (EPP) განცხადებით, საქართველოს მთავრობა პასუხისმგებელია ყოფილი პრეზიდენტის, მიხეილ სააკაშვილის ფიზიკურ და ფსიქიკურ ჯანმრთელობაზე. პარტია ქართულ ოცნებას მოუწოდებს, გადაიყვანონ სააკაშვილი შესაბამის ჰოსპიტალში.

"საქართველოს მთავრობა პასუხისმგებელია საქართველოს მე-3 პრეზიდენტის ფიზიკურ და ფსიქიკურ ჯანმრთელობაზე. ეს არ არის პოლიტიკური არჩევანის საკითხი, არამედ ადამიანის ფუნდამენტური უფლება. ჩვენ ვგმობთ ნებისმიერი ცილისმწამებლური თავდასხმას მმართველი პოლიტიკური ლიდერების მხრიდან ოპოზიციის, სახალხო დამცველის, დამოუკიდებელი ექიმებისა და სამოქალაქო საზოგადოების წინააღმდეგ.

მოვუწოდებთ ქართულ ოცნებას, აღიაროს სიტუაციის სიმძიმე და შესაძლო შეუქცევადი შედეგები. მოვუწოდებთ პასუხისმგებელ პირებს ჰუმანიტარული მიზნებისთვის სასწრაფოდ გადაიყვანონ ყოფილი პრეზიდენტი სააკაშვილი შესაბამის ჰოსპიტალში საქართველოში ან საზღვარგარეთ, სადაც ის გაივლის კვალიფიციურ მკურნალობა და რეაბილიტაციას", — წერს EPP.

ერთიანი ნაციონალური მოძრაობა ევროპის სახალხო პარტიის (EPP) ასოცირებული წევრია.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

28 აპრილს ულტიმატუმის ამოწურვის შემდეგ ექსპრეზიდენტის ოჯახი მთელი ქვეყნის მასშტაბით უწყვეტი აქციები დააანონსა.

ექიმ დეპუტატებს მონახულების მოწოდებით სააკაშვილმა გუშინ, 4 მაისს მიმართა. ექსპრეზიდენტმა განაცხადა, რომ მათთან არანაირ პოლიტიკურ დისკუსიას არ გამართავს და მხოლოდ სიმპტომებზე ესაუბრება. პასუხად, დღეს, 5 აპრილს ხუნდაძემ თქვა, რომ სააკაშვილთან შეხვედრის აზრს ვერ ხედავს და განაცხადა, რომ მან ჯანმრთელობა არა ვინმეს "უყურადღებობით ან უდიერი მოპყრობით", არამედ "საკუთარი სურვილით" გაუარესა.