ქართული ოცნების თავმჯდომარის, ირაკლი კობახიძის თქმით, უკრაინის დაზვერვის მიერ გავრცელებულ განცხადებაში არცერთი ფაქტი არ იყო წარმოდგენილი.

"ეს არის კიდევ ერთი სამწუხარო შემთხვევა, როდესაც ფაქტების გარეშე ვრცელდება ასეთი განცხადება უკრაინის ხელისუფლების მიერ. ამასაც აქვს, კიდევ ერთხელ, ძალიან მარტივი მიზეზი. ადამიანები აქ არიან რადიკალურ ოპოზიციაში, იქ არიან ხელისუფლებაში. ასეთ დროს ერთგვარი ინტერესი არსებობს და სამწუხაროა, რომ ასეთი მორიგი განცხადება ვიხილეთ, რომელიც არცერთ ფაქტს არ ეფუძნება.

არცერთი ფაქტი არ იყო წარმოდგენილი, შესაბამისად ჩვენ კიდევ უნდა ვთხოვოთ უკრაინის მხარეს, რომ სხვანაირი პასუხისმგებლობით მიუდგეს იმ ურთიერთობებს, რომელიც არს ჩამოყალიბებული ჩვენს ხალხებს შორის", — განაცხადა მან.

პირველ მაისს უკრაინის დაზვერვამ თქვა, რომ რუსეთი სხვა ქვეყნების დახმარებით სანქციების თავიდან არიდებას ცდილობს. მათი თქმით, რუსეთი აწარმოებს მოლაპარაკებებს საქართველოსთან, სომხეთთან და აზერბაიჯანთან რუსული პროდუქციის საერთაშორისო ბაზრებზე რეექსპორტისთვის.

უწყების თქმით, პროდუქციის მიწოდება იგეგმება ქართული, სომხური და აზერბაიჯანული პროდუქციის გამოყენებით და ასე გატანა მესამე ქვეყნებში. როგორც განცხადებაში ვკითხულობთ,ამ ქვეყნებში უკვე 200-ზე მეტი ასეთი კომპანიაა შექმნილი.