უკრაინის შეიარაღებული ძალების საჰაერო სარდლობის განცხადებით, ინფორმაცია კიევის აჩრდილის სავარაუდო გარდაცვალების შესახებ სიმართლეს არ შეესაბამება, რადგან ის არ არის კონკრეტული პიროვნება. მათი თქმით, კიევის აჩრდილი ავიაციის მე-40 ბრიგადის პილოტების კრებითი სახეა.

"კიევის აჩრდილი ეს არის სუპერგმირი-ლეგენდა, რომელიც შექმნეს უკრაინელებმა. უფრო ზუსტად ეს არის კრებითი სახე საჰაერო ძალების ტაქტიკური ავიაციის მე-40 ბრიგადის პილოტების, რომლებიც იცავენ დედაქალაქის ცას. რომლებიც მოულოდნელად ჩნდებიან იქ, სადაც მათ არ ელიან", — ნათქვამია განცხადებაში.

კიევის აჩრდილის შესახებ არცერთ ოფიციალურ წყაროს არანაირი დეტალი და ინფორმაცია არ დაუდასტურებია, ან გაუვრცელებია. ომის დასაწყისში გავრცელდა მხოლოდ პილოტის ფოტო, რომელიც სოციალურ ქსელში მალევე იქცა სიმბოლოდ.

"ომის პირველ დღეებში იყო მტრის თვითმფრინავების სროლების მაღალი ინტენსივობა. ჩვენ არც უარვყავით და არც დავადასტურეთ გმირი პილოტის — კიევის აჩრდილის ამბავი, რომელიც გამოიგონეს სოციალურ ქსელში. ის უკვე გახდა ლეგენდა, უკრაინელი სუპერმენი, შურისმაძიებელი, რომელიც ანადგურებს ოკუპანტებს. ჩვენთვის ყველა პილოტი გმირია", — ციტირებს პრესსპიკერს უკრაინასკა პრავდა.

29 აპრილს The Times-მა გამოაქვეყნა სტატია კიევის აჩრდილის დაღუპვის შესახებ. გამოცემა წერდა, რომ ამ ფსევდონიმის უკან სტეფან ტარაბალკა იდგა, რომელიც ბრძოლისას დაიღუპა. საჰაერო ძალების განცხადებით, სტეფან ტარაბალკა 2022 წლის 13 მარტს გმირულად დაიღუპა, თუმცა კიევის აჩრდილი არ ყოფილა.

"უკრაინის გმირი სტეფან ტარაბალკა არ არის კიევის აჩრდილი და მას არ ჩამოუგდია 40 თვითმფრინავი. 2022 წლის 13 მარტს მაიორი სტეფან ტარაბალკა გმირულად დაიღუპა რუს ოკუპანტებთან საჰაერო ბრძოლაში", — აღნიშნულია განცხადებაში.

უწყებაში აღნიშნავენ, რომ ჯერ კიდევ მარტში ჰქონდათ გამოქვეყნებული ინფორმაცია სტეფან ტარაბალკის შესახებ.