პოლონეთის პრემიერმინისტრის, მატეუშ მორავიეცკის განცხადებით, გაზის შეწყვეტა არის პირდაპირი თავდასხმა პოლონეთზე, თუმცა მანვე აღნიშნა, რომ ამისთვის ემზადებოდნენ. როგორც CNN წერს, მან პოლონეთის სეიმში გამოსვლისას კანონმდებლებს ალტერნატიული გაზის მილსადენები შესთავაზა და თქვა, რომ 2022 წლის შემოდგომისთვის პოლონეთს რუსული გაზი აღარ დასჭირდება.

"ეს არის პირდაპირი თავდასხმა პოლონეთზე... მაგრამ ჩვენ ამ მომენტისთვის ვემზადებოდით", — ამბობს ის.

მისი თქმით ამ შანტაჟის წინაშე ქედს არ იხრიან. ამბობს, რომ უკრაინა ფრონტის ხაზზეა და ეს არის ბრძოლა მშვიდობისთვის, ბრძოლა სუვერენიტეტისთვის.

"ჩვენ ამ შანტაჟის წინაშე ქედს არ ვიხრით. მინდა, დავარწმუნო ჩვენი თანამოქალაქეები, რომ პუტინის ქმედებები პოლონეთში არსებულ ვითარებაზე გავლენას ვერ მოახდენს. რუსეთმა არამხოლოდ უკრაინას, არამედ ენერგეტიკისა და სურსათის უსაფრთხოებას ესხმის თავს.

უკრაინა ფრონტის ხაზზეა. ჩვენ, ყველა ევროპულმა ქვეყანამ უნდა ვიცოდეთ, რომ ეს არის ბრძოლა მშვიდობისთვის, ბრძოლა სუვერენიტეტისთვის, ბრძოლა უსაფრთხოებისთვის და ამიტომ, რუსეთის წინაშე, ქედს ვერ მოვიხრით", — აღნიშნა მან.

პოლონეთის პრემიერმინისტრის თქმით, ქვეყანაში Świnoujście-ის ტერმინალი ექვსი მილიარდი კუბური მეტრიდან თხევადი ბუნებრივი აირის (LNG) წარმოებას რვა მილიარდ კუბურ მეტრამდე გაზრდის. ასევე, ნორვეგიაში ახალი ბალტიის გაზსადენის მშენებლობა 3 თვეში დასრულდება, რომელიც პოლონეთს 10 მილიარდ კუბურ მეტრ LNG-ს მიაწვდის.

"სლოვაკეთთან მშენებარე ახალი ტრანსსასაზღვრო მილსადენი, დასრულების შემდეგ, ხუთ მილიარდ კუბურ მეტრზე მეტ LNG-ს ამოტუმბავს", — ამბობს მორავიეცკი.

მისივე განმარტებით, პოლონეთს ინტერკონექტორები გერმანიასთან და ჩეხეთთან აქვს, რამდენიმე დღეში კი ლიტვასთანაც გახსნის.

რუსეთი პოლონეთსა და ბულგარეთს ბუნებრივი აირის მიწოდებას უჩერებს. ეს მას შემდეგ მოხდა, რაც რუსეთმა განაცხადა, რომ "არამეგობრულმა ქვეყნებმა" გაზის საფასურის გადახდა რუბლში უნდა დაიწყონ, რაზეც ბულგარეთმა და პოლონეთმა უარი თქვეს.

უკრაინის პრეზიდენტის ადმინისტრაციის უფროსის, ანდრეი ერმაკის განცხადებით, რუსეთი ევროპის გაზით შანტაჟს იწყებს. ვოლოდიმირ ზელენსკის განცხადებით კი რუსეთის საბოლოო მიზანი დემოკრატიისთვის გლობალური დარტყმის მიყენებაა.

ევროკომისიის ხელმძღვანელმა, ურსულა ფონ დერ ლაიენმა განაცხადა, რომ რუსეთის გადაწყვეტილება ევროპის ქვეყნებისთვის გაზის მიწოდების შეწყვეტასთან დაკავშირებით შანტაჟის ინსტრუმენტია. მისი თქმით, ეს ნაბიჯი გაუმართლებელი და მიუღებელია და აჩვენებს რუსეთის, როგორც გაზის მიმწოდებლის არასანდოობას.