NBC News ამერიკის შეერთებული შტატების ამჟამინდელ და ყოფილ ოფიციალურ პირებზე დაყრდნობით წერს, რომ აშშ-ის დაზვერვამ უკრაინას მიაწოდა დეტალური ინფორმაცია იმის შესახებ, თუ როდის და სად ჰქონდა დაგეგმილი რუსეთს რაკეტებისა და ბომბების ჩამოგდება, რაც უკრაინას საშუალებას აძლევდა საჰაერო თავდაცვა და თვითმფრინავები სახიფათო ზონიდან გაეყვანა.

მედიის ინფორმაციით, აშშ-ის მიერ დაზვერვის მონაცმების რეალურ დროში გაზიარება ომის პირველ დღეებში უკრაინას რუსული თვითმფრინავის ჩამოგდებაში დაეხმარა, რომელშიც ასობით ჯარისკაცი იმყოფებოდა.

NBC News წერს, რომ ეს იყო ნაწილი, რასაც ამერიკელი ოფიციალური პირები უწოდებენ მასიური და უპრეცედენტო დაზვერვის გაზიარების ოპერაციას NATO-ს არაწევრ პარტნიორთან, რომელმაც, მათი თქმით, გადამწყვეტი როლი ითამაშა უკრაინის წარმატებაში უკეთ აღჭურვილ რუსი სამხედროების წინააღმდეგ.

"დასაწყისიდან ჩვენ საკმაოდ ძლიერად ვიხრებოდით უკრაინისთვის სტრატეგიული და ქმედითი დაზვერვის გაზიარებისკენ. ამას ჰქონდა გავლენა, როგორც ტაქტიკურ, ასევე სტრატეგიულ დონეზე. არის მაგალითები, რომელთა მიხედვითაც შემიძლია გითხრათ, რომ ამან მნიშვნელოვანი ცვლილება გამოიწვია", — განუცხადა NBC News-ს ამერიკელმა ოფიციალურმა წარმომადგენელმა.

თეთრი სახლის ეროვნული უშიშროების საბჭოს სპიკერის თქმით, უკრაინას რეგულარულად აწვდიან დაზვერვის დეტალურ, დროულ ინფორმაციას, რათა დაეხმარონ მათ თავიანთი ქვეყანის რუსული აგრესიისგან დაცვაში.

NBC News წერს, რომ ზოგიერთ კონკრეტულ დეტალს, რომელიც მათ დაუდასტურეს არ ასაჯაროებენ აშშ-ს სამხედრო და დაზვერვის ოფიციალური პირების მოთხოვნით, რომლებიც ამბობენ, რომ ეს ინფორმაციები შესაძლოა რუსეთს დაეხმაროს.

ოფიციალური პირების თქმით, უკრაინა თითქმის ყოველდღე აგრძელებს საჰაერო თავდაცვისა და თვითმფრინავების გადაადგილებას ამერიკული დაზვერვის დახმარებით, რაც ერთ-ერთი მიზეზია, რის გამოც რუსეთმა ვერ შეძლო საჰაერო დომინირების დამყარება.