ევროკომისიის ხელმძღვანელმა, ურსულა ფონ დერ ლაიენმა განაცხადა, რომ რუსეთის გადაწყვეტილება ევროპის ქვეყნებისთვის გაზის მიწოდების შეწყვეტასთან დაკავშირებით შანტაჟის ინსტრუმენტია. მისი თქმით, ეს ნაბიჯი გაუმართლებელი და მიუღებელია და აჩვენებს რუსეთის, როგორც გაზის მიმწოდებლის არასანდოობას.

ლაიენი ამბობს, რომ ევროკავშირის წევრ ქვეყნებს აქვთ გეგმები ამ სცენარისთვის და ევროკომისია მჭიდრო კავშირშია მათთან, რათა უზრუნველყოს ალტერნატიული მიწოდება და შენახვის საუკეთესო დონე.

ევროკომიის ხელმძღვანელის თქმით, ახლა იმართება გაზის საკოორდინაციო ჯგუფის შეხვედრა, რათა განისაზღვროს ევროკავშირის კოორდინირებული პასუხი.

"ჩვენ ასევე გავაგრძელებთ საერთაშორისო პარტნიორებთან მუშაობას ალტერნატიული ნაკადების უზრუნველსაყოფად და მე გავაგრძელებ მუშაობას ევროპულ და მსოფლიო ლიდერებთან ევროპაში ენერგომომარაგების უსაფრთხოების უზრუნველსაყოფად", — ამბობს ის.

რუსეთი პოლონეთსა და ბულგარეთს ბუნებრივი აირის მიწოდებას უჩერებს. ბულგარეთის ენერგეტიკის სამინისტროს განცხადებით, მათ მიიღეს ცნობა, რომ მიწოდება 27 აპრილს შეუჩერდებათ.

ეს მას შემდეგ მოხდა, რაც რუსეთმა განაცხადა, რომ "არამეგობრულმა ქვეყნებმა" გაზის საფასურის გადახდა რუბლში უნდა დაიწყონ, რაზეც ბულგარეთმა და პოლონეთმა უარი თქვეს.

უკრაინის პრეზიდენტის ადმინისტრაციის უფროსის, ანდრეი ერმაკის განცხადებით, რუსეთი ევროპის გაზით შანტაჟს იწყებს. ვოლოდიმირ ზელენსკის განცხადებით კი რუსეთის საბოლოო მიზანი დემოკრატიისთვის გლობალური დარტყმის მიყენებაა.