უკრაინის პრეზიდენტის ადმინისტრაციის უფროსის მრჩევლის, მიხაილო პოდოლიაკის განცხადებით 40 ქვეყნის თავდაცვის მინისტრების შეხვედრის შემდეგ უკრაინა ძლიერდება. პოდოლიაკი ამის შესახებ Twitter-ზე წერს.

"ომის დაწყებისას რუსეთის ერთ-ერთი უცნაური მოთხოვნა იყო უკრაინის "სრული დემილიტარიზაცია". თავდაცვის 40 მინისტრის გუშინდელი ეპოქალური შეხვედრის შემდეგ, რუსეთისთვის ცუდი ამბავი მაქვს. სიმძლავრე, სიჩქარე, გამარტივებული ლოჯისტიკა, იარაღის გაფართოებული დიაპაზონი — უკრაინა ძლიერდება", — წერს ის.

გუშინ აშშ-ის თავდაცვის მდივანმა, ლოიდ ოსტინმა გერმანიაში 40-ზე მეტი ქვეყნის თავდაცვის მინისტრთან მოლაპარაკებები გამართა და უკრაინის შეიარაღების საკითხი განიხილეს. აშშ-ს არმიის გენერალმა, მარკ მილიმ თქვა, რომ მოლაპარაკებების მთავარი მიზანი კიევისთვის უსაფრთხოების მზარდი დახმარების სინქრონიზაცია და კოორდინაციაა, რომელიც მოიცავს მძიმე იარაღის მიწოდებას. შეხვედრას ესწრებოდა უკრაინის თავდაცვის მინისტრი ალექსეი რეზნიკოვი.

უკრაინის საგარეო საქმეთა მინისტრმა, დმიტრო კულებამ განაცხადა, რომ უკრაინა შევიდა სრულიად ახალ ფაზაში, რომელსაც ჯერ კიდევ ორი თვის წინ ვერავინ წარმოიდგენდა. მისი თქმით, უკრაინის შეიარაღებული ძალები NATO-ს იარაღით მომარაგდება.