ვირჯინიის შტატში გრძელდება ბოლო დროის ერთ-ერთი ყველაზე გახმაურებული სასამართლო პროცესი — მსახიობი ჯონი დეპი თავის ყოფილ ცოლს, ამბერ ჰერდს 2018 წელს გამოქვეყნებული ოპ-ედის გამო, სადაც ჰერდი ოჯახში ძალადობის გამოცდილებაზე წერს, ცილისწამებისთვის უჩივის.

ჯვარედინი დაკითხვისას, ამბერის ადვოკატმა ჯონი დეპს 2018 წელს გამოცემა Daily Mail-ში გამოქვეყნებულ სტატიაზე ჰკითხა, რომელშიც ეწერა, რომ ჯონი დეპს კარიბის ზღვის მეკობრეების ახალ ფილმში ჯეკ ბეღურას როლზე აღარ აიყვანდნენ.

"ამის შესახებ არ ვიცოდი, მაგრამ არ მიკვირს. 2 წელია, მსოფლიო ცოლზე მოძალადეს მეძახის. დარწმუნებული ვარ, დისნეის თავის დაზღვევის მიზნით სურდა, ჩემთან ურთიერთობა გაეწყვიტა", — განაცხადა დეპმა.

აღსანიშნავია, რომ ამბერ ჰერდმა ჯონი დეპი ძალადობაში პირველად 2016 წელს დაადანაშაულა და შემაკავებელი ორდერი მოითხოვა, თუმცა წყვილი ერთმანეთს დაშორდა და საქმე სამართლებრივი გზით გადაწყდა. დეპის თქმით, ამბერს ადვოკატების რჩევით $7 მილიონი გადაუხადა მიუხედავად იმისა, რომ თავს უდანაშაულოდ თვლიდა.

2018 წელს ამბერ ჰერდმა ოჯახში ძალადობის გამოცდილებაზე ოპ-ედი დაწერა. მიუხედავად იმისა, რომ ოპ-ედში ჯონი დეპის სახელი არ უხსენებია, დეპმა მას ცილისწამებისთვის უჩივლა, რადგან თვლიდა, რომ ბრალდებების მეორე ტალღა მის კარიერას გაანადგურებდა და სულერთია იყო, ოპ-ედში მისი სახელი პირდაპირ ეწერა თუ არა. დეპმა ისიც აღნიშნა, რომ სასამართლოს საბოლოო გადაწყვეტილების მიუხედავად, ბრალდებების უარყოფით შედეგებს მთელი ცხოვრება მოიმკის.

მიუხედავად იმისა, რომ კარიბის ზღვის მეკობრეების ახალ პროექტში დისნეის ჯონი დეპის მონაწილეობა არ დაუანონსებია, მსახიობის თქმით, კომპანია ჯეკ ბეღურას პერსონაჟს გასართობ პარკებსა და სხვა კამპანიებში ხშირად იყენებს. ჯონი დეპმა ისიც აღნიშნა, რომ საკულტო როლს შეთავაზების შემთხვევაშიც კი აღარ დათანხმდება.

"ფაქტია, მისტერ დეპ, რომ დისნეიმ $300 მილიონი და მილიონი ალპაკაც რომ შემოგთავაზოთ, ამქვეყნად ვერაფერი დაგარწმუნებთ, რომ დისნეისთან თანამშრომლობით კარიბის ზღვის მეკობრეების ფილმში დაბრუნდეთ, ხომ ასეა?" — ჰკითხა ამბერ ჰერდის ადვოკატმა ჯონი დეპს, რაზეც მსახიობმა უპასუხა: "სწორია".

აღსანიშნავია, რომ კარიბის ზღვის მეკობრეების სამყაროზე ახალი პროექტი 2019 წელს დაანონსდა. 2020 წელს კი ხმა გავრცელდა მე-6 ფილმის გადაღების შესახებ, რომელშიც მთავარი როლი მარგო რობიმ უნდა შეასრულოს.