მას შემდეგ, რაც რუსთავი 2-ის გენერალური დირექტორი, ნიკა გვარამია სასამართლო დარბაზიდან გააგდეს, მან საქართველოს პრეზიდენტს,პარლამენტის თავჯდომარესა და სახალხო დამცველს მიმართა:

"გამოიღვიძეთ, მეგობრებო! აქ ხდება არნახული უსამართლობა. აქ საფუძველი ეყრება, არა მხოლოდ საქართველოში დემოკრატიის ჩახშობას, არამედ სამოქალაქო დაპირისპირებას. გამოიღვიძეთ და შეასრულეთ თქვენი კონსტიტუციური ვალდებულებები".

მისი თქმით, საქართველოს პრემიერმინისტრისთვის მიმართვას აზრი საერთოდ არ აქვს, რადგან მისი არსებობის შესახებ ყველას ავიწყდება პერიოდულად.

თბილისის სააპელაციო სასამართლოში რუსთავი 2-ის საქმეს მოსამართლეები, ნათია გუჯაბიძე, ნატა ნაზღაიძე და შორენა ყაველაშვილი განიხილავენ. პროცესის პარალელურად სასამართლოს ეზოში აქცია მიმდინარეობს.

ტელეკომპანიის მხარდასაჭერად შეკრებილები არიან ადამიანები, რომლებიც მიიჩნევენ, რომ მოსამართლეები პოლიტიკურ ზეწოლას დაექვემდებარებიან და საქალაქო სასამართლოს გადაწყვეტილებას, რუსთავი 2-ის ქიბარ ხალვაშისთვის მიკუთვნებასთან დაკავშირებით, ძალაში დატოვებენ. მსგავსი განწყობა აქვთ სასამართლოში მისულ პოლიტიკოსებსა და თავად რუსთავი 2-ის მენეჯმენტს.