მიუხედავად იმისა, რომ თანამედროვე სამყაროში ყოველი მომდევნო თაობა წინაზე უფრო მონდომებით ებრძვის სტიგმებს, სიტყვა "სექსი" და სქესობრივ და რეპროდუქციულ ჯანმრთელობასთან, ძალადობასთან დაკავშირებული საკითხები ბევრისთვის დღემდე ტაბუდადებული თემაა. სტიგმის არსებობის ძირითადი მიზეზი განათლების ნაკლებობაა: ჩვენთვის საინტერესო და საჭირო თემებზე ხშირად არც სკოლაში გვესაუბრებიან და არც სახლში. ამიტომ სხვადასხვა, ზოგჯერ არასანდო და გადაუმოწმებელ წყაროებს მივმართავთ, რომლებიც ხანდახან სექსზე, ჯანმრთელობაზე, ძალადობასა და ჩვენს უფლებებზე არასწორ წარმოდგენას გვიქმნის.

"FM სიამოვნების ტალღა" — ასე ჰქვია აშშ-ის საელჩოს მხარდაჭერით დემოკრატიის ლაბორატორიის მიერ წამოწყებულ პროექტს, რომლის მთავარი მიზანი საზოგადოებისთვის სექსზე, რეპროდუქციულ ჯანმრთელობაზე, ინტიმურ ჰიგიენაზე, ძალადობასა და ქალთა უფლებებზე სწორი და სანდო ინფორმაციის მარტივი და გასაგები ენით მიწოდებაა. პროექტის ერთ-ერთი მნიშვნელოვანი ნაწილი ჩატბოტია, რომელსაც შენს ყველა კითხვაზე ამომწურავი და საინტერესო პასუხები აქვს.

ინფორმაციის მისაწოდებლად ჩატბოტის არჩევის მთავარი მიზანი ხელმისაწვდომობა და სიმარტივეა — სოციალური ქსელები ჩვენი ცხოვრების განუყოფელი ნაწილია, ამიტომ ნებისმიერ მსურველს შეუძლია, ჩატბოტს სასურველ თემებზე კითხვა განსჯის შიშის გარეშე დაუსვას და ამომწურავი ინფორმაცია მყისიერად მიიღოს.

"სექსი ის თემაა, რომელზეც კითხვების დასმა, ღიად საუბარი, იმის აღიარება, რომ რამე არ იცი ან გაინტერესებს, ყველას უჭირს — მით უმეტეს, როცა ახალგაზრდა ხარ და საქართველოში ცხოვრობ, სადაც მასწავლებლები ბიოლოგიის წიგნში "იმ თავს" ტოვებენ, შეკითხვების დასმას შეიძლება მოჰყვეს მშობლებისგან დატუქსვა, "გარყვნილების" დაბრალება, თანატოლებისგან დაცინვა და ა.შ.

სწორედ ამიტომ ვიფიქრეთ, რომ ასეთ ვითარებაში ჩატბოტი შეიძლებოდა ყოფილიყო კარგი საკომუნიკაციო ფორმატი — ციფრული პერსონაჟი, რომელიც მარტივად, კომპეტენტურად გპსუხობს შენთვის საინტერესო "უხერხულ" კითხვებზე და პარალელურად ინფორმაციას გაწვდის ისეთ თემებზე, რომლებზეც შეიძლება საერთოდ არ გიფიქრია, როგორიცაა შენი უფლებები, თანასწორობა, დახმარების მიღება საჭიროების შემთხვევაში და სხვა", — ამბობს დემოკრატიის ლაბორატორიის თავმჯდომარე ქეთი ბოჯგუა.

რა თემებზე შეუძლია ჩატბოტს საუბარი?

ამ ეტაპზე ჩატბოტი 4 ძირითად მიმართულებას აერთიანებს. ესენია:

1. სექსუალური ჯანმრთელობა (რეპროდუქცია, ინტიმური ჰიგიენა, უსაფრთხო სექსი, კონტრაცეფცია);
2. სექსი მოსულა (მასტურბაცია, პირველი სექსი, ორგაზმი და ანორგაზმია);
3. ქალთა უფლებები (აბორტი, პაციენტის უფლებები, სექსუალური ძალადობა);
4. ძალადობის პრევენცია (კიბერბულინგთან გამკლავება და პრევენცია; ნუდების გაგზავნა, ნუდებით შანტაჟი; ოჯახში ძალადობასთან გამკლავება და პრევენცია; სექსუალური შევიწროება სამსახურში, ქუჩაში თუ სხვა სიტუაციაში და მისი პრევენცია)

აღსანიშნავია, რომ ჩატბოტის კითხვებსა და პასუხებზე კონკრეტული სფეროების პროფესიონალებმა — საინფორმაციო სამედიცინო-ფსიქოლოგიური ცენტრის "თანადგომას" ექსპერტებმა, გაგუას კლინიკის ექიმებმა და ახალგაზრდული პლატფორმის imitom.ge-ის ავტორებმა იმუშავეს.

როგორ უნდა გაესაუბრო ჩატბოტს?

თუ ჩატბოტთან საუბარი გინდა, უნდა ეწვიო imitom.ge-ის ფეისბუქგვერდს და მესენჯერში სიტყვა "მაზლი" მიწერო. ამის შემდეგ ჩატბოტი თემებს შემოგთავაზებს, რომელთა არჩევის შემდეგაც კითხვებზე გადასვლა და მათზე პასუხების წაკითხვა შეგიძლია.

რა თქმა უნდა, სექსის, რეპროდუქციული ჯანმრთელობის, ძალადობისა და სხვა თემების შესახებ კითხვების ამოწურვა მარტივი არაა, ამიტომ, ქეთი ბოჯგუას თქმით, ჩატბოტს უახლოეს მომავალში აუდიტორიისთვის საინტერესო სხვა მნიშვნელოვან საკითხებზეც ექნება პასუხები.

"აუდიტორიის რეაქცია, ჩატბოტის მომხმარებლების რაოდენობა და მათი შეფასება გვაფიქრებინებს, რომ სწორ ფორმატს მივაგენით. მივიღეთ არაერთი მადლობა და თხოვნა, რომ სხვა მიმართულებებითაც დავამატოთ ინფორმაცია. თემების დამატებას აუცილებლად ვაპირებთ და ღია ვართ ნებისმიერ თანამშრომლობისთვის. ეს ხომ ის საკითხია, რომლის ამოწურვა პრაქტიკულად შეუძლებელია. ასე რომ ჩვენს ჩატბოტსა და მის აუდიტორიას წინ ბევრი საინტერესო ამბავი ელოდება", — ამბობს ქეთი ბოჯგუა.

ჩატბოტის გამოყენებისა და საჭირო კითხვებზე პასუხების მოსმენის შემდეგ კიდევ ერთხელ დარწმუნდებით, თუ რაოდენ მნიშვნელოვანია ქალებისთვის, განსაკუთრებით კი მოზარდებისა და თინეიჯერებისთვის უსაფრთხო სექსზე, რეპროდუქციულ ჯანმრთელობაზე, ძალადობასა და სხვა თემების შესახებ ინფორმაციის სწორი, სტიგმებისგან თავისუფალი ფორმით მიწოდება. იმ შემთხვევაშიც კი, როცა ამ საჭირო საკითხებზე სკოლასა თუ სახლში ინფორმაციას ვერ ვიღებთ, "FM სიამოვნების ტალღა" შესაძლებლობას გვაძლევს, უმნიშვნელოვანეს კითხვებზე სანდო და სწორი პასუხები მივიღოთ.