საგარეო საქმეთა და უსაფრთხოების პოლიტიკის სფეროში ევროკავშირის უმაღლესი წარმომადგენლის, ჯოზეფ ბორელის განცხადებით, ლვოვისა და დასავლეთ უკრაინის სხვა ქალაქების დაბომბვა აჩვენებს, რომ ქვეყნის არცერთი ნაწილი არ არის დაცული კრემლის აგრესიისგან.

"რამდენიმე კვირაა რუსეთი უკრაინას ყველაზე ინტენსიური სარაკეტო თავდასხმებით უტევს. ევროკავშირი გმობს რუსეთის შეიარაღებული ძალების მიერ მშვიდობიანი მოსახლეობისა და სამოქალაქო ინფრასტრუქტურის განურჩეველ და უკანონო დაბომბვას", — განაცხადა მან.

მისივე თქმით, ევროკავშირი უკრაინაში ომის დანაშაულების შესახებ გამოძიების მხარდაჭერას აგრძელებს და რუსეთს ომის შეწყვეტისკენ კიდევ ერთხელ მოუწოდებს.

დღეს, 18 აპრილს ლვოვზე რუსულმა არმიამ 4 სარაკეტო თავდასხმა განახორციელა. ლვოვის ოლქის რეგიონული სამხედრო ადმინისტრაციის ხელმძღვანელის თქმით, სამი ბომბი სამხედრო ინფრასტრუქტურის ობიექტებს მოხვდა. ბოლო ინფორმაციით, რუსების თავდასხმის შედეგად, ლვოვში 7 ადამიანი დაიღუპა, ხოლო 11 დაშავდა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში