მარიუპოლის მერის მრჩევლის, პეტრო ანდრიუშენკოს განცხადებით, ხვალიდან რუსული ძალები ალყაში მოქცეულ ქალაქს დაკეტავენ. ის წერს, რომ ოკუპანტებმა ქალაქის შიგნით გადაადგილებისთვის საშვების გაცემა დაიწყეს.

"ასობით მოქალაქეს რიგში დგომა უწევს საშვის ასაღებად, რომლის გარეშეც, არამხოლოდ ქალაქის უბნებს შორის გადაადგილება, არამედ ქუჩაში გასვლაც აეკრძალებათ", — ციტირებს ანდრიუშენკო CNN.

გამოცემა მერის მრჩეველზე დაყრდნობით წერს იმასაც, რომ ქალაქში დარჩენილი კაცები "გაიფილტრებიან", ანუ მოუწევთ რუსული ძალების შემოწმების გავლა.

მარიუპოლი ომის დაწყების პირველივე დღეებიდან ალყაშია, ის ხშირად გახდა თავდასხმის ობიექტი, მათ შორის, მშვიდობიან მოსახლეობაზე. ოკუპანტები სწორედ მარიუპოლში თავს დაესხნენ სამშობიაროს და ბავშვთა საავადმყოფოს. მათ ასევე დაბომბეს თეატრი, სადაც ასობით მშვიდობიანი მოქალაქე აფარებდა თავს. განადგურებულია ქალაქის ინფრასტრუქტურა.

ქალაქში ვერ ხერხდება ჰუმანიტარული დახმარების შეტანა. წითელი ჯვარი მარიუპოლის ტერიტორიაზე ვერ შედის. ქალაქს მარიუპოლის მცველები — აზოვის ბატალიონი და 36-ე საზღვაო ქვეითი ბრიგადა იცავს. ბრიგადამ ალყის გარღვევა და აზოვის ბატალიონთან შეერთება 13 აპრილ შეძლო.

იკრაინის მაღალი თანამდებობის პირები ამბობენ, რომ ქალაქი ჰუმანიტარული კატასტროფის ზღვარზეა. უკრაინის პრეზიდენტი ვოლოდიმირ ზელენსკი და საგარეო საქმეთა მინისტრი დმიტრო კულება ამბობენ, რომ მარიუპოლი მოლაპარაკებების პროცესში, შესაძლოა წითელი ხაზი გახდეს.

რუსეთმა მარიუპოლის მცველებს 17 აპრილს ულტიმატუმი წაუყენა და დანებება მოსთხოვა, რაზეც უარი მიიღო. ამის შემდეგ, რუსეთის თავდაცვის სამინისტრო ქალაქის მცველების განადგურებით დაიმუქრა.

უკრაინის პრემიერმინისტრმა, დენის შმიგალმა დღეს ისაუბრა, რომ მარიუპოლი ჯერ კიდევ არ დაცემულა და ქალაში კვლავ რჩებიან უკრაინის სამხედრო ძალები.