ავსტრიის კანცლერის, კარლ ნეჰამერას განცხადებით, რუსული გაზის იმპორტის შეწყვეტა ახლა "შეუძლებელია". CNN-თან ინტერვიუში მან თქვა ისიც, რომ სანქციები უნდა დაწესდეს რუსეთის წინააღმდეგ, მაგრამ ისეთი, რომელიც კრემლს დააზიანებს და არა ევროკავშირს.

"ვფიქრობ, ჩვენ ახლა უფრო ჭკვიანურად უნდა ვიფიქროთ სანქციებზე, თუ როგორ შეგვიძლია ზიანი მივაყენოთ რუსეთის ფედერაციას, არა ევროკავშირისთვის ზიანის მიყენებით. ვფიქრობ, ეს არის მთავარი. ჩვენ ვცდილობთ, რუსული გაზისგან დამოუკიდებელი გავხდეთ და ეს ავსტრიის სურვილიც არის, მაგრამ ახლა ეს შეუძლებელია. ამას დრო დასჭირდება", — ამბობს ის.

მან ასევე აღნიშნა, რომ რუსული გაზის საკითხი სხვა სირთულესთან ასოცირდება და გარდა ავსტრიისა, ამ პოზიციას გერმანია, უნგრეთი და ბულგარეთიც იზიარებენ.

"რუსულ გაზზე ემბარგოს წინააღმდეგი მხოლოდ ავსტრია არ არის. მეორე მხრივ, ავსტრია მხარს უჭერს ევროკავშირის სხვა წევრი ქვეყნებთან ერთად რუსეთის წინააღმდეგ დაწესებულ სანქციებს, მაგრამ სანქციებმა უფრო მეტად რუსეთს უნდა დაარტყას, ვიდრე ევროკავშირს", — თქვა ნეჰამერმა.

10 აპრილს ავსტრიის კანცლერი, უკრაინის დედაქალაქ კიევში ჩავიდა და უკრაინის პრეზიდენტ ვოლოდიმირ ზელენსკის შეხვდა. 11 აპრილს კი რუსეთის პრეზიდენტს, ვლადიმერ პუტინს მოსკოვში შეხვდა.

Reuters-ის თანახმად, ავსტრიის კანცლერმა, კარლ ნეჰამერმა განაცხადა, რომ ვლადიმერ პუტინთან შეხვედრა ძალიან პირდაპირი, ღია და ხისტი იყო.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.