აზოვის ბატალიონის განცხადებით, რუსეთის საოკუპაციო ძალებმა მარიუპოლში, დაახლოებით, ერთი საათის წინ უკრაინელი სამხედროებისა და მშვიდობიანი მოქალაქეების წინააღმდეგ გაურკვეველი წარმომავლობის მომწამვლელი ნივთიერება გამოიყენეს. ამის შესახებ ინფორმაციას ისინი ტელეგრამზე ავრცელებენ.

მათი თქმით, ნივთიერება რუსებმა უპილოტო საფრენი აპარატიდან ჩამოაგდეს. დაზარალებულებს აღენიშნებათ სუნთქვის უკმარისობა. აზოვის ბატალიონის ცნობით, ნივთიერების გამოყენების შედეგები ზუსტდება.

უკრაინსკა პრავდას განცხადებით, თავდაცვის სამინისტროსთან დაახლოებულმა წყარომ მათ უთხრა, რომ რუსი ოკუპანტების მიერ ქიმიური იარაღის გამოყენების ალბათობა ძალიან მაღალია. როგორც გამოცემა წერს, მარიუპოლის მერის მრჩეველმა, პეტრ ანდრიუშჩენკომ განაცხადა, რომ ქიმიური იარაღის გამოყენების შემთხვევაში მოქმედი ინსტრუქციები მარიუპოლისთვის არ არის აქტუალური, რადგან ქალაქში თითქმის არ არის შემორჩენილი ფანჯარა ან შენობა, არ არის წყალი. მისივე თქმით, ინფორმაცია ქიმიური თავდასხმის შესახებ ზუსტდება.