BBC-ის თანახმად, მარიუპოლის მერის მოადგილე, სერგეი ორლევი იარაღის ამოწურვასა და გადამწყვეტ ბრძოლასთან დაკავშირებით 36-ე ბრიგადის სახელით გავრცელებულ ცნობას უარყოფს. მისი თქმით, მარიუპოლისთვის ბრძოლა გრძელდება.

"საზღვაო ბრიგადის შესახებ ინფორმაცია ყალბია. მე ყალბზე კომენტარს არ ვაკეთებ [...] რუსებმა მოახდინეს ქალაქის ნაწილის დროებით ოკუპირება. უკრაინელი მებრძოლები აგრძელებენ ქალაქის ცენტრალური და სამხრეთის ნაწილების დაცვას, ასევე, ინდუსტრიული ზონებისა და სხვა", — განაცხადა მან.

ამასთან, როგორც Facebook-ზე უკრაინის შეიარაღებული ძალების მთავარსარდალმა, ვალერი ზალუჟნიმ დაწერა, უკრაინელ სამხედროებთან სტაბილური, ღია კავშირზე არიან და აკეთებენ "შეუძლებელსა და შესაძლებელს".

უკრაინის 36-ე საზღვაო ბრიგადის სახელით გავრცელდა ინფორმაცია, რომ ალყაში მოქცეულ მარიუპოლში დღეს, შესაძლოა, გადამწყვეტი ბრძოლა იყოს, რადგან საბრძოლო მასალა იწურება. როგორც საზღვაო ბრიგადის მიერ გავრცელებულ პოსტში წერია, 47 დღეა მარიუპოლს იცავენ და ბევრი თანამებრძოლი დაკარგეს.