პრემიერმინისტრი არ აფასებს პრორუსული პარტიის, პატრიოტთა ალინსის ვიზიტს მოსკოვში. ჟურნალისტების კითხვის პასუხად ღარიბაშვილმა თქვა, რომ ამის შეფასება მისი მხრიდან სწორი არ იქნება.

"ვფიქრობ არ არის საინტერესო და ვფიქრობ უადგილო არის და საერთოდ, მე ვფიქრობ, რომ ამ თემაზე ზედმეტი კომენტარის გაკეთება ჩემი მხრიდან არ იქნება სწორი", — მხოლოდ ეს უთხრა მან ჟურნალისტებს.

უკრაინაში მიმდინარე ომისა და ცივილიზებული სამყაროს მხრიდან რუსეთის სრული იზოლაციის ფონზე, პატრიოტთა ალიანსის ლიდერები, ირმა ინაშვილი და დავით თარხან-მოურავი აგრესორ ქვეყანაში ჩავიდნენ. ინფორმაცია ამის შესახებ პარტიას თავად არ გაუვრცელებია და ცნობილი რუსეთის ფედერაციის საბჭოს 4 აპრილის განცხადებიდან გახდა.

"საუბრისას განიხილეს რუსეთ-საქართველოს ურთიერთობების განვითარების საკითხები", — გვამცნობს რუსული საბჭო და იქვე საერთაშორისო საქმეთა კომიტეტის თავმჯდომარის პირველი მოადგილის, ვლადიმერ ჯაბაროვის განცხადებას ურთავს, რომელშიც ოკუპანტი ქვეყნის წარმომადგენელი ამტკიცებს, თითქოს რუსეთი ჩვენი მეგობარია.