ამერიკის შეერთებული შტატების სახელმწიფო დეპარტამენტის პრესსპიკერი, ნედ პრაისი უკრაინის ბრალდებასთან დაკავშირებით დასმულ კითხვაზე რუსეთში კონტრაბანდის შეტანის ხელშეწყობაზე, პასუხობს, რომ ბრალდებებზე ვერ ისაუბრებს, მაგრამ ქვეყნები, რომლებიც ეხმარებიან მოსკოვის საომარ ძალისხმევას, ნახავენ შედეგებს.

"მე არ ვარ იმ პოზიციაში, რომ დავასაბუთო ან ვისაუბრო თქვენს მიერ ნახსენებ ბრალდებაზე. ჩვენ ვისაუბრეთ ამის შესახებ გასულ კვირას, მაგრამ საქართველოს მოსახლეობას ახალი მეხსიერება აქვს იმასთან დაკავშირებით, თუ რას ნიშნავს რუსეთის აგრესია, მათ შორის სუვერენული ტერიტორიების წართმევის მცდელობებზე. ჩვენ ვნახეთ, ქართველი ხალხი, საქართველოს მთავრობა საერთაშორისო საზოგადოების გვერდით დგას, მათ შორის მნიშვნელოვანი კენჭისყრის დროს გაეროში, ეს ეწინააღმდეგება იმას, რასაც კრემლი ახორციელებს უკრაინაში. ჩვენ ახლო კონტაქტზე ვართ კოლეგებთან საქართველოში მიმდინარე სიტუაციასთან დაკავშირებიტ და გავაგრძელებთ მათთან ახლო კონტაქტს.

ერთ რომელიმე ქვეყანაზე საუბრის გარეშე, ჩვენ ვთქვით, რომ ქვეყნები, რომლებიც ცდილობენ გვერდი აუარონ სანქციებს, რომლებიც შეერთებულმა შტატებმა და მოკავშირეებმა, პარტნიორებმა მთელ მსოფლიოში, დააწესეს ან ის ქვეყნები, რომლებიც სხვაგვარად ცდილობენ ომის ძალისხმევის მხარდაჭერას — კრემლის ომის რუსეთისთვის ფინანსური მხარდაჭერით, მომარაგებით, იარაღით უზრუნველყოფის ძალისხმევით, ისინი ნახავენ შედეგებს. ისინი ნახავენ შედეგებს სანქციების გვერდის ავლის მცდელობების ან სხვა ნებისმიერი ქმედების განხორციელებისთვის, რომელიც სხვაგვარად ეხმარება მოსკოვის საომარ ძალისხმევას", — ამბობს პრაისი.

უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი განცხადებით, ქართულმა სპეცსამსახურებმა მიიღეს დავალება პოლიტიკური პირებისგან, რომ არ ჩარეულიყვნენ ამ საკითხში. დაზვერვაში აცხადებენ, რომ დღეს ცნობილია რუსეთის ფედერაციისთვის სამხედრო პროდუქციის მიწოდების კიდევ ერთი არხი, აღმოსავლეთ აზია. მათივე თქმით, განიხილება საქართველოსა და რუსეთის ფედერაციას შორის საჰაერო მიმოსვლის აღდგენის შესაძლებლობა.

გაიგე მეტი: