საქართველოში ამერიკის შეერთებული შტატების ყოფილი ელჩი, იან კელი რუსეთისთვის სანქციების დაწესებასთან დაკავშირებით პრემიერმინისტრ ირაკლი ღარიბაშვილის განცხადებას ეხმაურება და წერს, რომ ეს შიშზე დაფუძნებული პოლიტიკაა და არა პრინციპებზე. მისი თქმით, ეს პოზიცია ქართველი ხალხის ინტერესებს არ წარმოადგენს.

"პოლიტიკა,რომელიც დაფუძნებულია შიშზე და არა პრინციპებზე. მისი ქვეყნის 2/3-ს სურს ევროკავშირსა და ნატოში გაწევრიანება. ეს პოზიცია არ წარმოადგენს არც დასავლეთის ღირებულებებს და არც მისი ხალხის ინტერესებს", — წერს იან კელი.

მას შემდეგ რაც არამხოლოდ დასავლეთმა, არამედ მსოფლიოს ბევრმა ქვეყანამ რუსეთს უკრაინაში შეჭრის გამო სანქციები დაუწესა, ღარიბაშვილი კვლავ აცხადებს, რომ საქართველო რუსეთს ეკონომიკურ სანქციებს არ დაუწესებს და ამბობს, რომ ეს გადაწყვეტილება "ეროვნული ინტერესებიდან" გამომდინარე მიიღეს. ღარიბაშვილი მიიჩნევს, რომ რუსეთისთვის საქნციების დაწესება ქართველი ხალხისთვის იქნება ცუდი და არა რუსეთისთვის.