ესტონეთის მთავრობის განცხადებით, რუსული ტაქსის კომპანია Yandex-ის წინააღმდეგ სანქციები დაამტკიცა და ქვეყნის მასშტაბით მუშაობა აეკრძალა. როგორც მათ მიერ გამოქვეყნებულ განცხადებაში ვკითხულობთ, სანქციების დაწესების მნიშვნელოვანი მიზეზი რუსეთის ბოლო გადაწყვეტილებაა, რომლის მიხედვითაც Yandex-მა შეგროვებული პერსონალური მონაცემები რუსულ სპეცსამსახურებს უნდა გადასცეს.

ესტონეთის პრემიერმინისტრმა, კაია კალასმა დატვიტა, რომ დამატებითი სანქციების დაწესება აუცილებელია ესტონეთის უსაფრთხოების დასაცავად. მისი თქმით, კომპანიების, რომლებიც თანამშრომლობენ რუსეთის დაზვერვასთან, ადგილი ესტონეთში არაა.

"Yandex-ის აკრძალვა არის მკაფიო სიგნალი, რომ კომპანიებს, რომლებიც თანამშრომლობენ რუსეთის დაზვერვის სამსახურებთან, ადგილი არ აქვთ ესტონეთში", — ამბობს ის.

სანქციების მიხედვით, ინტერნეტ სერვისის პროვაიდერებმა უნდა შეზღუდონ წვდომა ტაქსებთან დაკავშირებულ ვებსაიტებზე — Yandex Go და Yandex Pro-ზე. ასევე, აპლიკაციებმა Google Play და App Store უნდა შეზღუდონ Yandex.Taxi-ის აპლიკაციის ჩამოტვირთვა და შეწყვიტონ მათი განახლებების შეთავაზება. ესტონეთის მთავრობის განცხადებით, სანქციები ძალაში 11 აპრილს შევა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში