ევროპული საქართველოს ლიდერი გიგა ბოკერია ამბობს, რომ ხელისუფლება ეროვნული ინტერესების გათვალისწინებით არ მოქმედებს, რისი შედეგია საქართველოს ოკუპირებული რეგიონის დე ფაქტო პრეზიდენტის, ანატოლი ბიბილოვის განცხადება, შესაძლო ანექსიაზე.

"მიუხედავად იმისა, რომ ცხინვალის რეგიონის ანექსია პუტინის რეჟიმს უკვე მოხდენილი აქვს, ჩვენი პოლიტიკური უბედურება არის ის, რომ ჩვენ გვყავს ხელისუფლება, რომელიც მთელი ამ წლების განმავლობაში განსაკუთრებით ახლა არ მოქმედებს ჩვენი ეროვნული ინტერესების დასაცავად მაშინ, როცა ჩვენი მტერი მოქმედებს ჩვენს წინააღმდეგ, ამის შედეგია თუნდაც ის განცხადებები შესაძლო ანექსიის შესახებ, ჩვენ არ ვიცით ეს ნაბიჯი გადაიდგმება თუ არ გადაიდგმება, ჩვენ ვიცით ერთი რამე, რომ ჩვენი მტერი მოქმედებს და ჩვენ გვყავს მთავრობა, რომელიც მოქმედებს ჩვენი ეროვნული ინტერესების საწინააღმდეგოდ", — ამბობს ბოკერია.

მას შემდეგ, რაც საქართველოს ოკუპირებული რეგიონის დე ფაქტო პრეზიდენტმა, ანატოლი ბიბილოვმა განაცხადა, რომ რუსეთთან შეერთებისთვის მალე ზომებს მიიღებდა, მათ ოფიციალურ გვერდზე პროპაგანდისტული შინაარსის სხვადასხვა განცხადება გავრცელდა, მათ შორის, იმაზე, რომ რუსეთთან გაერთიანებაზე რეფერენდუმი დაიგეგმება. ე.წ. რეფერენდუმი რუსეთისთვის ნაცადი ხერხია — იგივე მეთოდები გამოიყენეს უკრაინაში, როდესაც ანექსირებული ყირიმი რუსეთის ნაწილად გამოაცხადეს.

ე.წ. სახელმწიფო სააგენტო რესზე გამოქვეყნდა პარლამენტის სპიკერისა და ე.წ. პრეზიდენტის პრესსპიკერის განცხადებები. პარლამენტის სპიკერის თქმით, ე.წ. რეფერენდუმი უახლოეს მომავალში ჩატარდება და რუსეთთან შეერთებაზე ხალხი საკუთარ აზრს გამოთქვამს. მისივე განცხადებით, არანაირი სამართლებრივი წინააღმდეგობა არ არსებობს, რომ საქართველოს ოკუპირებული რეგიონი რუსეთს შეუერთდეს.

ამავე თემაზე: