მას შემდეგ, რაც საქართველოს ოკუპირებული რეგიონის დე ფაქტო პრეზიდენტმა, ანატოლი ბიბილოვმა განაცხადა, რომ რუსეთთან შეერთებისთვის მალე ზომებს მიიღებდა, მათ ოფიციალურ გვერდზე პროპაგანდისტული შინაარსის სხვადასხვა განცხადება გავრცელდა, მათ შორის, იმაზე, რომ რუსეთთან გაერთიანებაზე რეფერენდუმი დაიგეგმება. ე.წ. რეფერენდუმი რუსეთისთვის ნაცადი ხერხია — იგივე მეთოდები გამოიყენეს უკრაინაში, როდესაც ანექსირებული ყირიმი რუსეთის ნაწილად გამოაცხადეს.

ე.წ. სახელმწიფო სააგენტო რესზე გამოქვეყნდა პარლამენტის სპიკერისა და ე.წ. პრეზიდენტის პრესსპიკერის განცხადებები. პარლამენტის სპიკერის თქმით, ე.წ. რეფერენდუმი უახლოეს მომავალში ჩატარდება და რუსეთთან შეერთებაზე ხალხი საკუთარ აზრს გამოთქვამს. მისივე განცხადებით, არანაირი სამართლებრივი წინააღმდეგობა არ არსებობს, რომ საქართველოს ოკუპირებული რეგიონი რუსეთს შეუერთდეს.

რაც შეეხება პრესსპიკერს, ის ამბობს, რომ ეს მოხდება ე.წ. საპრეზიდენტო არჩევნების შემდეგ, რომელიც 10 აპრილს არის დაგეგმილი. მისი მტკიცებით, რუსეთთან შეერთების ყველა იურიდიული პროცედურა არჩევნების შემდეგ დასრულდება. ის იმასაც ამტკიცებს, რომ ეს გადაწყვეტილება საპრეზიდენტო არჩევნებთან დაკავშირებული არ არის და იმით არის განპირობებული, რომ "სამხრეთ ოსეთისთვის შესაძლებლობების ახალი ფანჯარა გაიხსნა".

აქვე აღნიშნულია, რომ ე.წ. კანონის მიხედვით, რეფერენდუმის ჩატარებაზე ბრძანების გაცემადე ფაქტო პრეზიდენტს შეუძლია, რომელიც განსაზღვრავს თარიღს — ხმის მიცემა შეიძლება დაინიშნოს ბრძანების გამოქვეყნებიდან 2-3 თვის განმავლობაში, დასვენების დღეს.

ბიბილოვის განცხადებიდან მალევე პროპაგანდა ამუშავდა და მას სხვა დე ფაქტო ლიდერებიც გამოეხმაურნენ. ყველა განცხადება "მოძმე ერების გაერთიანებაზე" ერთ ნარატივს ატარებს.

მათ შორისაა, ოკუპირებული აფხაზეთის ე.წ. უსაფრთხოების საბჭოს ხელმძღვანელი, სერგეი შამბა, რომელმაც განაცხადა, რომ ოკუპირებული აფხაზეთისა და "სამხრეთ და ჩრდილოეთ ოსეთის გაერთიანება ეროვნული ოცნებაა და აფხაზეთი ამას მხარს დაუჭერს". რაც შეეხება ოკუპირებულ აფხაზეთს, შამბას თქმით, არც პოლიტიკურ წრეებში და არც საზოგადოებაში რუსეთთან გაერთიანების განწყობები არ არის.

რესი ავრცელებს ანექსირებული ყირიმის ე.წ. ხელმძღვანელის, სერგეი აქსენოვის განცახდებასაც, რომელმაც იგივე პროპაგანდისტული მესიჯი გაიმეორა და ასევე განაცხადა, რომ ეს "ერების გაერთიანებას" ნიშნავს. მისი თქმით, ისინი სრულიად მხარს უჭერენ ანატოლი ბიბილოვის ამ განცხადებას. გამოცემის ინფორმაციით, იდენტური პოზიცია ჰქონდა რუსეთის მიერ ახლახან აღიარებული ოკუპირებული დონეცკის დე ფაქტო ხელმძღვანელსაც — დენის პუშილინმა განაცხადა, რომ მხარს უჭერს ამ ინიციატივას და ბიბილოვს.

აქვე გამოქვეყნდა რუსი სენატორის განცხადება, რომლის მტკიცებითაც, ოკუპირებული ცხინვალის რეგიონს კანონით შეუძლია რუსეთს შეუერთდეს მხოლოდ რეფერენდუმით, ანუ ხალხის სურვილის მიხედვით. მისი თქმით, რუსული კანონი ამას ითვალისწინებს.